Дапамога беспрацоўным перавышае 30 рублёў толькі ў двух рэгіёнах — Гомельскай і Віцебскай абласьцях. Finance.tut.by паглядзеў, наколькі памер сярэдняй дапамогі пры беспрацоўі адрозьніваецца ў розных рэгіёнах Беларусі.
Найбольшая сярэдняя дапамога беспрацоўным у чэрвені 2019 году была ў Гомельскай вобласьці, пры гэтым яна склала ўсяго 13,4% ад бюджэту пражытковага мінімуму на душу насельніцтва. Менш за ўсё — у Менску (11,3% ад бюджэту пражытковага мінімуму).
Сярэдняя дапамога беспрацоўным у чэрвені 2019 году:
- Гомельская вобласьць — 31 рубель,
- Віцебская — 30,8 рубля,
- Берасьцейская — 29,5 рубля,
- Горадзенская — 28,81 рубля,
- Магілёўская — 29,67 рубля,
- Менская — 29,3 рубля,
- Менск — 26,1 рубля.
Максымальны памер дапамогі пры беспрацоўі ў Беларусі складае 2 базавыя велічыні (51 рубель). У суседніх краінах такая дапамога заўважна большая, чым у Беларусі.
Міністарка працы і сацыяльнай абароны Ірына Касьцевіч шматкроць адзначала, што цяперашняя дапамога — «дастаткова маленькая велічыня», і ўлады ўжо ня першы год абяцаюць прыдумаць, як яе павысіць, але бясплённа. Чыноўнікі вырашылі, што павялічваць гэтыя выплаты заўчасна.
Раней міністэрства працы і сацыяльнай абароны выступала за разьвіцьцё сыстэмы страхаваньня паводле рынкавай мадэлі, дзе чалавек атрымлівае вялікую дапамогу пры беспрацоўі. «Той, хто апынуўся бяз працы, цягам паўгода зможа разьлічваць на выплаты ў памеры 60% ад яго сярэдняга заробку на апошнім працоўным месцы», — казаў раней прадстаўнік міністэрства працы Алег Токун.
Паводле падлікаў міністэрства, штомесячная складка пры такой мадэлі павінна складаць 0,5% ад фонду аплаты працы, суму мусяць плаціць пароўну наймальнік і работнік. Гэта значыць работнік замест 1% у ФСАН плаціцьме 1,25%.
Страхаваньне ад беспрацоўя прапаноўвалі зрабіць абавязковым, але атрымліваць дапамогу змаглі б толькі тыя, хто зарэгістраваўся ў службе занятасьці. Аднак далей за абмеркаваньне гэтая справа не пайшла.
У Беларусі «працаздольныя грамадзяне, не занятыя ў эканоміцы» (як яны самі сябе жартам назвалі, «дармаеды») мусяць цалкам кампэнсаваць пэўныя камунальныя паслугі зь дзяржаўнай датацыяй.
Галоўнае пра «дармаедзкі» дэкрэт
Дэкрэт «Аб садзейнічаньні занятасьці насельніцтва», падпісаны Аляксандрам Лукашэнкам у студзені 2018 году, абавязаў усіх «не занятых у эканоміцы» грамадзян Беларусі ў поўным аб’ёме плаціць за датаваныя дзяржавай паслугі ЖКГ, пачынаючы з 2019 году.
7 пытаньняў і адказаў пра новы «дармаедзкі» дэкрэт
Пазьней 10 сьнежня Лукашэнка пазбавіў семʼі, дзе ўсе працаздольныя — «дармаеды», права на атрыманьне дзяржпадтрымкі пры будаўніцтве жытла.
- У «базу дармаедаў» занесьлі каля 425 тысяч чалавек. У іх лік трапілі, напрыклад, грамадзяне, якія сплацілі падаходны падатак, а таксама частка тых, хто стала пражывае за мяжой.
- Каб давесьці ўладам памылковасьць занясеньня ў базу, неабходна зрабіць шэраг бюракратычных захадаў.
Імаверна, пастанову Саўміну аб «дармаедах» ад 31 сакавіка прынялі задняй датай. Вядома, што 4 красавіка гэтай пастановы яшчэ не было.
Папярэдні «дармаедзкі» дэкрэт перапісалі
Першы дакумэнт аб «дармаедах» — дэкрэт № 3 ад 2015 году — абавязваў грамадзян, якія пастаянна пражываюць у Беларусі і ня ўдзельнічалі ў фінансаваньні дзяржаўных выдаткаў або ўдзельнічалі менш за паўгода, сплачваць збор памерам 20 базавых велічыняў. Інакш ім пагражаў штраф або адміністрацыйны арышт.
У 2017 годзе збор сплацілі больш за 54 тысячы чалавек з 470 тысяч, якім былі разасланыя паведамленьні, казалі ў Міністэрстве падаткаў і збораў.
Дзеяньне дэкрэту прыпынілі пасьля пратэстных «Маршаў недармаедаў», якія праходзілі ў гарадах Беларусі ўвесну 2017 году.
