Аляксандар Лукашэнка 10 сьнежня падпісаў указ, згодна зь якім семʼі, дзе ўсе працаздольныя — «дармаеды», пазбаўляюцца права на атрыманьне дзяржпадтрымкі пры будаўніцтве жытла, піша interfax.by са спасылкай на прэс-службу Лукашэнкі.
«Дармаеды» змогуць паўторна зьвярнуцца па дзяржаўную дапамогу, «калі адпалі падставы адносіць іх да грамадзянаў, не занятых у эканоміцы», — адзначылі ў прэс-службе Лукашэнкі.
Разам з тым указ Лукашэнкі павялічыў да 50% памер субсыдыі для сплаты асноўнай пазыкі па камэрцыйных крэдытах для:
- дзяцей-сірот;
- грамадзянаў, якія выхоўваюць дзяцей-інвалідаў.
Паводле ўказу, шматдзетныя семʼі, якія выхоўваюць дзяцей з інваліднасьцю, могуць атрымаць дзяржпадтрымку для будаўніцтва жытла ў першую чаргу.
Галоўнае пра «дармаедзкі» дэкрэт
Дэкрэт «Аб садзейнічаньні занятасьці насельніцтва», падпісаны Аляксандрам Лукашэнкам у студзені 2018 году, абавязаў усіх «не занятых у эканоміцы» грамадзян Беларусі ў поўным аб’ёме плаціць за датаваныя дзяржавай паслугі ЖКГ, пачынаючы з 2019 году.
7 пытаньняў і адказаў пра новы «дармаедзкі» дэкрэт
Пазьней 10 сьнежня Лукашэнка пазбавіў семʼі, дзе ўсе працаздольныя — «дармаеды», права на атрыманьне дзяржпадтрымкі пры будаўніцтве жытла.
- У «базу дармаедаў» занесьлі каля 425 тысяч чалавек. У іх лік трапілі, напрыклад, грамадзяне, якія сплацілі падаходны падатак, а таксама частка тых, хто стала пражывае за мяжой.
- Каб давесьці ўладам памылковасьць занясеньня ў базу, неабходна зрабіць шэраг бюракратычных захадаў.
Імаверна, пастанову Саўміну аб «дармаедах» ад 31 сакавіка прынялі задняй датай. Вядома, што 4 красавіка гэтай пастановы яшчэ не было.
Папярэдні «дармаедзкі» дэкрэт перапісалі
Першы дакумэнт аб «дармаедах» — дэкрэт № 3 ад 2015 году — абавязваў грамадзян, якія пастаянна пражываюць у Беларусі і ня ўдзельнічалі ў фінансаваньні дзяржаўных выдаткаў або ўдзельнічалі менш за паўгода, сплачваць збор памерам 20 базавых велічыняў. Інакш ім пагражаў штраф або адміністрацыйны арышт.
У 2017 годзе збор сплацілі больш за 54 тысячы чалавек з 470 тысяч, якім былі разасланыя паведамленьні, казалі ў Міністэрстве падаткаў і збораў.
Дзеяньне дэкрэту прыпынілі пасьля пратэстных «Маршаў недармаедаў», якія праходзілі ў гарадах Беларусі ўвесну 2017 году.
ТЭСТ: Даведайцеся, ці вы «дармаед»?
