Лінкі ўнівэрсальнага доступу

«Павінна быць пажыцьцёвае зьняволеньне». Рэпартаж са стаўпецкага суду, дзе пачаўся працэс аб падвойным забойстве ў школе


Суд Стаўпецкага раёну Менскай вобласьці, 19 жніўня 2019 году
Суд Стаўпецкага раёну Менскай вобласьці, 19 жніўня 2019 году

Родныя настаўніцы, якая загінула падчас лютаўскіх падзей, патрабуюць больш жорсткага пакараньня для абвінавачанага, чым гэта прадугледжвае Крымінальны кодэкс.

Суд па справе аб падвойным забойстве ў стаўпецкай школе пачаўся ў судзе Стаўпецкага раёну аб 11 гадзіне. Прыкладна за гадзіну да пачатку каля будынку пачалі зьбірацца дзяржаўныя і незалежныя журналісты. Абвінавачанага прывезьлі загадзя, самым ранкам.

Абвінавачаны Вадзім М.
Абвінавачаны Вадзім М.

Судзьдзя менскага абласнога суду разам з сакратаром прыехаў прыкладна за 40 хвілін да пачатку працэсу.

«Сёньня пачынаюць яго судзіць? Думаю, гэта ўсё настаўнікі вінаватыя. Такая бяда», — так абмяркоўвалі ў фае пачатак працэсу наведнікі стаўпецкага суду.

Сястра, муж і сын забітай настаўніцы Марыны Пархімовіч
Сястра, муж і сын забітай настаўніцы Марыны Пархімовіч

Пацярпелымі на працэсе пакуль прызнаныя толькі два чалавекі — муж загінулай настаўніцы Вячаслаў Пархімовіч і бацька забітага 11-клясьніка Аляксандра Раманава — Сяргей. Яны прыйшлі на суд амаль адначасова, за 20 хвілін да пачатку працэсу.

«Больш за 10 гадоў яму не дадуць»

Маці Вадзіма М. (зьлева) і родныя загінулай настаўніцы Марыны Пархімовіч
Маці Вадзіма М. (зьлева) і родныя загінулай настаўніцы Марыны Пархімовіч

«Я нічога ад суду не чакаю, — сказаў муж загінулай настаўніцы Вячаслаў Пархімовіч. — Нічога яму ня будзе. Тое, што ён нарабіў, і пакараньне — яно неадэкватнае. Артыкулы абвінавачваньня нармальныя, але яму ня могуць прысудзіць больш за 10 гадоў. Павінна быць пажыцьцёвае зьняволеньне. Ужо вядома, што 8–10 гадоў, больш яму не дадуць».

Архіўнае фота. На пахаваньні настаўніцы Марыны Пархімовіч. 13 лютага 2019 году
Архіўнае фота. На пахаваньні настаўніцы Марыны Пархімовіч. 13 лютага 2019 году

Разам зь ім на працэс прыйшлі сястра Марыны Пархімовіч Алена і яе сын Антон. Яны падалі хадайніцтва аб прызнаньні пацярпелымі. Калі судзьдзя яго задаволіць, то ім таксама дазволяць прысутнічаць на паседжаньнях.

Пракурор
Пракурор

«Пра сапраўдныя матывы мы ня ведаем нічога, — сказаў сын загінулай настаўніцы Антон Пархімовіч. — Спадзяюся, нам пра іх у судзе раскажуць. А магчыма, што і не даведаемся ніколі. Напачатку нам сказалі, што мы ня зможам прысутнічаць на судзе, толькі мой бацька. Сёньня мы прыйшлі з хадайніцтвам. Сёньня яго будуць разглядаць. Магчыма, нам дазволяць».

Сын, сястра і муж забітай настаўніцы Марыны Пархімовіч
Сын, сястра і муж забітай настаўніцы Марыны Пархімовіч

На погляд родных загінулай, самыя вялікія пытаньні выклікае закрытасьць працэсу. Афіцыйна яе тлумачаць тым, што абвінавачанаму на момант зьдзяйсьненьня злачынства не было 18 гадоў. А таксама — што падчас працэсу будуць разгалошаныя зьвесткі пра стан яго здароўя. Ніхто з пацярпелых зрабіць суд закрытым не прасіў. Наадварот.

«Чаму суд закрыты, — кажа сястра загінулай настаўніцы Алена. — У маёй маці пастаянна пытаньне, чаму нікога не пускаюць. Значыць, хаваюць нешта? Я не магу ёй патлумачыць, чаму суд закрыты».

Бацькі Вадзіма М.
Бацькі Вадзіма М.

«Ходзяць чуткі, што яго цкавалі ў школе»

Абвінавачаны Вадзім М.
Абвінавачаны Вадзім М.

Сына загінулай настаўніцы абурае найперш тое, што абвінавачаны ў выпадку прызнаньня яго вінаватым зможа выйсьці на свабоду праз адносна невялікі тэрмін.

«Такое адчуваньне, што ён мэтанакіравана ішоў забіваць людзей, — кажа сын загінулай настаўніцы. — Для яго гэта было як забава. Як кветкі на клюмбе рэзаць. Ён жа ня едучы на аўтамабілі забіў, не выпадкова. Пасьля суду, калі нам нешта скажуць пра яго рэальныя матывы, я ўсё раскажу. Факт, што праз восем гадоў гэты чалавек будзе хадзіць па вуліцах. Ходзяць чуткі, што яго цкавалі ў школе. Праз восем гадоў вы ў чарзе недзе яму на нагу наступіце, а ён за кутом вас дагоніць, і вы „ляжаце“. Думаеце, восем гадоў яго выправяць?»

«Я нічога ад працэсу не чакаю»

Акрамя родных Марыны Пархімовіч, на працэс таксама прыйшлі бацька загінулага 11-клясьніка Аляксандра Раманава і бацькі абвінавачанага. Нейкі час яны чакалі пачатку працэсу побач з пацярпелымі, размаўляць з журналістамі ня сталі.

Бацька загінулага 11-клясьніка Сяргей Раманаў
Бацька загінулага 11-клясьніка Сяргей Раманаў

«Я нічога ад працэсу не чакаю. І так усё зразумела, — сказаў Свабодзе бацька загінулага 11-клясьніка. — Ці буду задаволены працэсам, пакуль не магу сказаць. Я ж ня ведаю, чым ён скончыцца. Зьбіраюся хадзіць на ўсе паседжаньні. Колькі дадуць абвінавачанаму, мне ўсё адно. Пакараньне будзе неадпаведным таму, што ён нарабіў».

Колькі працягнецца разгляд справы, пакуль невядома. На працэс у якасьці сьведак будуць выклікаць настаўнікаў і вучняў школы, дзе здарылася трагедыя. А таксама іншых асобаў, якіх апытвалі супрацоўнікі Сьледчага камітэту падчас сьледзтва.

Бацька забітага школьніка Сяргей Раманаў
Бацька забітага школьніка Сяргей Раманаў

Забойства ў стаўпецкай школе. Асноўнае

  • Паводле сьледзтва 11 лютага ў стаўпецкай сярэдняй школе № 2 вучань 10 клясы напаў з нажом на настаўніцу і трох вучняў.
  • 50-гадовая настаўніца гісторыі і грамадазнаўства і вучань 11 клясы загінулі, двух аднаклясьнікаў нападніка шпіталізавалі з раненьнямі.
  • Сьледчы камітэт завёў крымінальныя справы за забойства двух і больш чалавек і спробу забойства. Паводле ч. 2 арт. 139 Крымінальнага кодэксу Рэспублікі Беларусі нападніку могуць прысудзіць ад 8 да 12 гадоў турмы.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG