Лінкі ўнівэрсальнага доступу

У Стоўпцах пачынаецца суд у справе аб двайным забойстве ў школе


Ля будынку суду Стаўпцоўскага раёну Менскай вобласьці, дзе мае адбыцца паседжаньне. Стоўпцы, 19 жніўня 2019 году

Справу будзе разглядаць Менскі абласны суд у выязным паседжаньні. Працэс пройдзе ў закрытым рэжыме.

Працэс у справе аб двайным забойстве ў стаўпецкай школе пачнецца ў 11.00 у панядзелак 19 жніўня ў Стоўпцах. Першапачаткова паведамлялася, што працэс будзе разглядаць Менскі абласны суд. Пазьней у прэс-службе Вярхоўнага суда ўдакладнілі, што разгляд справы адбудзецца ў Стоўпцах на выязных паседжаньнях.

Як паведамілі Свабодзе родныя загінулых, яны не падавалі хадайніцтва аб закрыцьці працэсу для грамадзкасьці і СМІ. Гэтае рашэньне было прынятае бязь іх удзелу. Родныя ахвяраў лічаць, што працэс можна было зрабіць адкрытым.

«Чаму працэс пройдзе ў закрытым рэжыме? Цяжка сказаць, — расказаў Свабодзе бацька загінулага 11-клясьніка Аляксандра Раманава Сяргей. — Я думаю, што лепш бы працэс быў адкрыты. У мяне засталіся пытаньні да таго, як вялося сьледзтва. Толькі што ад гэтага цяпер, які сэнс? Суд, сьледзтва, — цяпер гэта ўжо фармальнасьці. Мая думка такая, што тут хутчэй псыхалягічны фактар, з гэтым злачынствам».

Суд Стаўпецкага раёну Менскай вобласьці, 19 жніўня 2019 году
Суд Стаўпецкага раёну Менскай вобласьці, 19 жніўня 2019 году

Родныя загінулай настаўніцы паведамілі Свабодзе, што будуць прасіць суд дапусьціць іх на працэс у якасьці пацярпелых. Пакуль пацярпелым прызнаны толькі муж загінулай Марыны Пархімовіч Вячаслаў.

У якасьці сьведак у працэсе будуць удзельнічаць вучні і настаўнікі стаўпецкай школы № 2, а таксама родныя абвінавачанага.

Вадзіма М. абвінавачваюць у злачынствах, прадугледжаных · ч. 3 арт. 339 (хуліганства з выкарыстаньнем зброі), · пп.1, 6, 13 ч. 2 арт.139 (забойства дзьвюх і больш асобаў з асаблівай жорсткасьцю з хуліганскімі матывамі), · ч.1 арт.14 (замах на злачынства) і · пп.1, 6, 10, 13 ч. 2 арт. 139 (забойства дзьвюх і больш асобаў з асаблівай жорсткасьцю з хуліганскімі матывамі і забойства асобы ў сувязі з выкананьнем ёй службовых абавязкаў).

Разгляд справы будзе закрыты (паводле ч. 2 арт.23 УПК), бо М. не дасягнуў 16-гадовага ўзросту на момант злачынстваў, у якіх яго абвінавачваюць. Да таго ж у матэрыялах справы ёсьць зьвесткі пра стан ягонага здароўя, якія складаюць мэдыцынскую тайну (арт. 46 закону «Аб ахове здароўя»).

Коратка пра справу

Раніцай 11 лютага адзін з вучняў стаўпецкай сярэдняй школы № 2, Вадзім М., 2003 году нараджэньня, напаў з нажом на настаўніцу і некалькіх вучняў. Настаўніца і адзін вучань загінулі на месцы, яшчэ двое вучняў трапілі ў шпіталь. Нападнік уцёк. Затрымалі хлопца празь некалькі гадзін у пад’езьдзе аднаго са стаўпецкіх шматпавярховікаў. Пазьней высьветлілася, што акрамя нажа, нападнік быў узброены таксама малатком, а пацярпелых было больш.

Як праходзіла расьсьледаваньне

Справай ад пачатку займаўся цэнтральны апарат Сьледчага камітэту. Празь некалькі гадзін на месца здарэньня прыехаў старшыня СК Іван Наскевіч, які сустракаўся з вучнямі і настаўнікамі школы. Большасьць зь іх перасталі размаўляць з журналістамі, спасылаючыся на пажаданьні сьледчых.

У першыя дні пасьля здарэньня Вадзім М адмаўляўся даваць паказаньні і не ішоў на кантакт з супрацоўнікамі СК. Сьледчыя падрабязна вывучалі кампутар і тэлефон нападніка. Паведамлялася, што перад злачынствам ён выдаліў свае акаўнты ў сацсетках, а таксама зьнішчыў інфармацыю зь цьвёрдых дыскаў. Вадзім М. пасьля затрыманьня быў накіраваны на экспэртызу ў «Навінкі», якая ня выявіла ў яго адхіленьняў псыхічнага стану.

Галоўнае пытаньне

Адзін з самых таямнічых момантаў стаўпецкай трагедыі, які павінен высьветліць суд, — матывы злачынства. У першыя дні пасьля яго выстаўляліся вэрсіі пра канфлікт паміж Вадзімам М. і старшаклясьнікамі, а таксама перадузятае стаўленьне да яго з боку загінулай настаўніцы. У момант злачынства абвінавачаны не знаходзіўся ў стане алькагольнага альбо наркатычнага ап’яненьня.

Сьледчы камітэт паведамляе таксама, што Вадзім М. прызнаў сваю віну толькі часткова. Яго абвінавачваюць паводле часткі 2 артыкулу 139 (забойства дзьвюх асобаў з асаблівай жорсткасьцю з хуліганскіх памкненьняў) і паводле 14-й часткі артыкулу 139 (спроба забойства з хуліганскіх памкненьняў).

Забойства ў стаўпецкай школе. Асноўнае

  • Паводле сьледзтва 11 лютага ў стаўпецкай сярэдняй школе № 2 вучань 10 клясы напаў з нажом на настаўніцу і трох вучняў.
  • 50-гадовая настаўніца гісторыі і грамадазнаўства і вучань 11 клясы загінулі, двух аднаклясьнікаў нападніка шпіталізавалі з раненьнямі.
  • Сьледчы камітэт завёў крымінальныя справы за забойства двух і больш чалавек і спробу забойства. Паводле ч. 2 арт. 139 Крымінальнага кодэксу Рэспублікі Беларусі нападніку могуць прысудзіць ад 8 да 12 гадоў турмы.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG