Аляксандар Лукашэнка 11 чэрвеня прызначыў новым міністрам унутраных справаў Юрыя Караева, які да таго камандаваў унутранымі войскамі.
Як перадае БелТА, з новым міністрам ён абмеркаваў ранейшыя затрыманьні цыганоў, якія праходзілі па ўсёй краіне пасьля сьмерці міліцыянта ў Магілёве.
Аляксандар Лукашэнка сказаў новаму міністру, што «ня трэба, як вось адбылося з цыганамі». Ён нагадаў, што выбачацца перад цыганамі езьдзіла кіраўніца Адміністрацыі прэзыдэнта Натальля Качанава — на ягонае даручэньне.
«Пакрыўдзілі людзей ні за што, — казаў Лукашэнка. — Дык трэба прасіць прабачэньня».
У дзяржаўных СМІ не ўдакладняецца, ці згадваў ён, што перад цыганамі адмовіўся выбачацца дзейны на той момант, а з учорашняга дня былы міністар унутраных справаў Ігар Шуневіч.
Таксама Лукашэнка расказаў, што калі зроблена нейкае злачынства, тады ў першую чаргу правяраюць асобаў, якія ўчынілі такое злачынства.
«Больш за тое, калі ў выпадку са сьмерцю супрацоўніка праваахоўных органаў у Магілёве падазрэньне першапачаткова па ягонай жа наводцы ўпала на канкрэтную групу грамадзянаў», — ускоснай мовай пераказвае БелТА словы Лукашэнкі.
«Перабаршчылі, — казаў Лукашэнка пра дзеяньні праваахоўнікаў да цыганоў. — Убачылі, што яны невінаватыя. Дык ідзіце і проста выбачцеся перад імі. І людзі зразумеюць. Ня трэба плугам ці бульдозэрам перці на ўсё, што перад табой. Недзе трэба і акуратней, дзесьці абʼехаць. А не атрымалася — прасі прабачэньня».
Лукашэнка дадаў, што «ня трэба лічыць людзей сваімі ворагамі» і ня варта разважаць «ах, там вось гэтыя цыганы, яны такія-сякія».
«Нармальныя яны людзі, — ацаніў Лукашэнка цыганскі народ. — Што, сярод беларусаў, расейцаў, габрэяў ці палякаў у нас тут няма злачынстваў? Ды хапае!»
***
16 траўня ў Магілёве ў межах расьсьледаваньня крымінальнай справы па факце меркаванага забойства супрацоўніка ДАІ Яўгена Патаповіча міліцыянты масава затрымлівалі грамадзянаў цыганскай нацыянальнасьці. Людзі скардзіліся журналістам на зьбіцьцё і жорсткае абыходжаньне.
Толькі ў Магілёве ў месцах кампактнага пражываньня цыганоў затрымалі каля 100 чалавек: жанчын, непаўналетніх і мужчын. Частку зь іх пазьней вызвалілі, а каля 50 мужчын затрымалі на трое сутак. Адносна іх пазаводзілі адміністрацыйныя справы за нібыта дробнае хуліганства. Затрыманьні адбываліся таксама ў Гомлі і па ўсёй краіне.
Шуневіч заявіў 23 траўня, што ў яго «няма ні прычыны, ні падстаў прасіць прабачэньня ў цыганоў», але пазьней у той жа дзень перад цыганамі выбачылася Качанава. Ды тыдзень таму генэральны пракурор Беларусі Аляксандар Канюк расказаў, што магілёўскія цыганы ня скардзіліся на затрыманьні.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў