Лінкі ўнівэрсальнага доступу

Wall Street Journal: брат Кім Чэн Ына супрацоўнічаў з ЦРУ


Кім Чэн Нам, зводны брат паўночнакарэйскага лідэра Кім Чэн Ына, фота 2010 году

Амэрыканскае выданьне сьцьвярджае, што зводны брат лідэра КНДР даваў інфармацыю амэрыканскім спэцслужбам.

Кім Чэн Нам, зводны брат паўночнакарэйскага лідэра Кім Чэн Ына, які быў забіты ў Малайзіі ў 2017 годзе, зьяўляўся інфарматарам Цэнтральнага выведнага ўпраўленьня ЗША, паведаміў Wall Street Journal (WSJ).

У сваім матэрыяле выданьне спасылаецца на неназванага «чалавека, дасьведчанага ў гэтым пытаньні», і адзначае, што многія дэталі адносінаў Кім Чэн Нама з ЦРУ застаюцца няяснымі.

Пацьверджаньня інфармацыі WSJ зь іншых крыніц пакуль няма. ЦРУ адмовілася ад камэнтароў.

WSJ спасылаецца на сваю крыніцу, якая адзначае, што паміж ЦРУ і Кім Чэн Намам «была сувязь». «Некалькі былых службовых асобаў ЗША заявілі, што зводны брат, які шмат гадоў жыў па-за межамі Паўночнай Карэі і ня меў палітычнай падтрымкі ў Пхэньяне, наўрад ці мог даваць падрабязнасьці аб унутраным жыцьці краіны», — гаворыцца ў артыкуле.

Былыя афіцыйныя асобы ЗША таксама заявілі, што хутчэй за ўсё Кім Чэн Нам зьвязваўся са спэцслужбамі іншых краінаў, у прыватнасьці Кітаю, піша WSJ.

Прадстаўнікі Паўднёвай Карэі і ЗША заявілі, што ўлады Паўночнай Карэі далі загад забіць Кім Чэн Нама, які крытыкаваў дынастычнае праўленьне сваёй сям’і. Пхэньян абверг гэтыя абвінавачваньні.

45-гадовы Кім Чэн Нам памёр па дарозе ў бальніцу 13 лютага 2017 году, пасьля таго, як ён нібыта быў атручаны дзьвюма жанчынамі, што падышлі да яго ў Міжнародным аэрапорце Куала-Лумпура, адкуль ён зьбіраўся вылецець у Макао, сьцьвярджалі малазійскія і паўднёвакарэйскія афіцыйныя асобы.

У сакавіку 2019 году суд у Малайзіі вызваліў з-пад варты адну з падазраваных — 26-гадовую грамадзянку Інданэзіі Сіці Айш’я. У траўні 2019 году другая жанчына — 28-гадовая грамадзянка Віетнаму Доан Тхі Хуонг выйшла на волю празь месяц пасьля прысуду.

Згодна з артыкулам WSJ, Кім Чэн Нам прыехаў у Малайзію ў лютым 2017 году, каб сустрэцца са сваёй кантактнай асобай з ЦРУ, хоць гэта, магчыма, і не было адзінай мэтай паездкі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG