Прэс-сакратар Акруговай пракуратуры Варшавы Пётр Антоні Скіба паведаміў тэлеканалу «Белсат», што сёньня пачалося расьсьледаваньне справы аб ненаўмысным забойстве:
«Гэта традыцыйная фармулёўка, якая даецца ў сытуацыях, калі прычына сьмерці невядомая. Будзе праведзенае анатамаваньне — мы ня ведаем, калі дакладна, магчыма, гэта будзе яшчэ да Калядаў. Не выключаю, што пасьпеюць да Новага году».
Прадстаўнік пракуратуры адзначыў, што праваахоўныя органы будуць абнародаваць толькі тыя зьвесткі ў гэтай справе, якія адпавядаюць інтарэсам сям’і нябожчыка:
«Цела ў цяперашні момант застаецца ва Ўстанове судовай мэдыцыны Варшаўскага мэдычнага ўнівэрсытэту, і гэтая ўстанова будзе выконваць ускрыцьцё. З увагі на зацікаўленасьць мэдыяў мы будзем імкнуцца абнародаваць зьвесткі, якія не супярэчаць інтарэсам сямʼі загінулага. Далейшыя працэсуальныя дзеяньні залежаць ад вынікаў судова-мэдычнай экспэртызы. Усё залежыць ад таго, што стане вядома пасьля ўскрыцьця».
Звычайна анатамаваньне праводзіцца цягам двух тыдняў.
«Магчыма, вынікі з’явяцца раней. Мы ўжо тэлефанавалі ў судмэдэкспэртызу з просьбай, каб зрабілі ўсё як мага хутчэй», — сказаў Скіба.
Ён таксама паведаміў, што пакуль у сувязі са сьмерцю была апытаная толькі ўдава Мікіты і што галоўная вэрсія сьледзтва цяпер — негвалтоўная сьмерць:
«На гэтым этапе мы бярэм пад увагу, што сьмерць магла адбыцца з натуральных прычынаў, але ўсё гэта праверым шляхам пасьлядоўнага збору доказавага матэрыялу».
Журналіст, аўтар youtube-каналаў «Жыцьцё-малiна» і «Загляне сонца» Мікіта Мелказёраў памёр у ноч на 21 верасьня дома ў Варшаве. Яму было 37 гадоў.
Форум