Лінкі ўнівэрсальнага доступу

Што дзяржаўныя СМІ расказалі пра суд над галоўным рэдактарам Tut.by


Тытульная старонка БелТА ў дзень, калі пачаўся суд над Марынай Золатавай

12 лютага суд Заводзкага раёну Менску пачаў разгляд справы рэдактаркі Tut.by Марыны Золатавай, якую абвінавачваюць у «бязьдзеяньні службовай асобы». Суд над рэдактарам буйнога інфармацыйнага парталу ў Беларусі адбываецца ўпершыню ў гісторыі. Свабода паглядзела, як гэтую падзею асьвятлялі дзяржаўныя СМІ.

На галоўнай старонцы ні слова

Дзяржаўнае агенцтва БелТА, якое ініцыявала гучную справу аб несанкцыянаваным доступе да інфармацыі, на раніцу 12 лютага абмежавалася адной навіной. «Рэдактара інфармацыйнага парталу судзяць у Менску па абвінавачваньні ў бязьдзеяньні». Гэтая навіна на сайце стаіць у разьдзеле навінаў. А на тытульнай старонцы галоўнай навіной 3 сутак прастаяла інфармацыя пра перамогу каманды Лукашэнкі ў «Менскай лыжні».

Так выглядала тытульная старонка БелТА увечары 12 лютага
Так выглядала тытульная старонка БелТА увечары 12 лютага

Так яна стала выглядаць 12 лютага пасьля 11 калі пачаўся суд над Золатавай
Так яна стала выглядаць 12 лютага пасьля 11 калі пачаўся суд над Золатавай

У сваёй навіне БелТА ня згадвае, хто ініцыяваў гэты працэс, ігнаруе інфармацыю пра тое, што на працэс над Марынай Золатавай прыйшла поўная заля людзей, а Марыну Золатаву сустрэлі аплядысмэнтамі.

Таксама БелТА ня кажа, што ў судзе прадстаўнікі гэтага дзяржагенства заявілі да Золатавай дадатковую позву на 6 тысяч рублёў (каля 3 тысяч даляраў). І суд гэтую позву задаволіў, хаця раней Марына Золатава ўжо пагасіла нібыта нанесеную шкоду агенцтву БелТА.

Напісалі назву парталу, пра БелТУ, авацыі і поўную залю — не

Газэта Адміністрацыі прэзыдэнта «СБ: Беларусь сегодня» напісала пра суд над галоўнай рэдактаркай Tut.by пару абзацаў. Пра тое, хто ініцыяваў справу, пра дадатковую позву ад БелТА, авацыі і поўную залю назіральнікаў за працэсам няма ні слова.

Тытульная старонка «СБ: Беларусь сегодня» 12 лютага
Тытульная старонка «СБ: Беларусь сегодня» 12 лютага

Дзяржаўная газэта прыгадала, што ўсяго ў «справе БелТА» праходзілі 14 чалавек. З 13 абвінавачаньні былі зьнятыя, бо яны пагасілі шкоду. Марына Золатава таксама кампэнсавала шкоду, але ёй двойчы адмовілі ў прыпыненьні супраць яе крымінальнай справы. Пра гэта таксама ні слова.

Буйное менскае інфармагенцтва пра суд ня піша

Менскае інфармацыйнае агенцтва «Минск-новости» пра суд над Марынай Золатавай на 11.00 не напісала нічога нават у стужцы навінаў. Тут расказваюць пра новыя «МАЗы» да падрыхтоўку да Эўрагульняў, узьвядзеньне новых жылых дамоў ды іншы пазытыў.

На сайтах БТ, ОНТ, СТБ — ні слова пра суд над Золатавай

На 11-ю гадзіну, калі суд ужо пачаўся, дзяржаўныя тэлеканалы БТ, АНТ, СТБ пра суд над Золатавай на сваіх сайтах не напісалі нічога. Галоўнай навіной тут застаецца трагедыя ў Стоўпцах, дзе школьнік забіў настаўніцу гісторыі, адзінаццаціклясьніка і параніў яшчэ двух хлопцаў.

Галоўная старонка Белтэлерадыёкампаніі
Галоўная старонка Белтэлерадыёкампаніі

Пры гэтым супрацоўнікі дзяржаўных каналаў у залі суду прысутнічаюць. Карэспандэнт Радыё Свабода бачыў журналістаў АНТ і СТВ, а значыць, сюжэт пра суд усё ж выйдзе.

Трагедыю ў Стоўпцах таксама ігнаравалі

Напярэдадні дзяржаўныя СМІ амаль праігнаравалі трагедыю ў Стоўпцах, дзе школьнік забіў сваю настаўніцу і вучня, а таксама параніў яшчэ дваіх. На тытульных старонках дзяржаўных мэдыя БелТА і «СБ: Беларусь сегодня» нічога не пісалі, інфармацыя зьяўлялася ў стужцы навінаў. На БТ інфармацыя пра трагедыю ў Стоўпцах прагучала на 22-й хвіліне «Панарамы».

Гэта быў пяты па ліку сюжэт. Першымі ішлі навіны спорту: «Сьнежны снайпэр», перамога беларускіх тэнісістак у Кубку Фэдэрацыі над немкамі, потым быў агляд рынку працы ў Беларусі.

У вечаровым выпуску «Нашых навінаў» на тэлеканале АНТ паведамленьне пра трагедыю ў Стоўпцах прайшло на 14-й хвіліне. Гэта таксама была пятая па ліку навіна: спачатку расказалі пра галалёд і сьнегапады, пасьля — пра віншаваньне Лукашэнкі з чарговай гадавінай Іранскай рэвалюцыі, супрацоўніцтва Міністэрстваў замежных справаў краін СНД і выставу харчовых тавараў у Маскве.

Суд над Марынай Золатавай у «cправе БелТА». Што важна ведаць

  • Крымінальны працэс супраць галоўнай рэдактаркі парталу Tut.by Марыны Золатавай пачаўся 12 лютага. Золатаву абвінавачвалі ў бязьдзеяньні службовай асобы. Крымінальны кодэкс Беларусі прадугледжвае ў гэтым артыкуле пакараньне ў выглядзе штрафу альбо пазбаўленьня волі тэрмінам да 5 гадоў.
  • Пракурор Юлія Харчэйкіна патрабавала аштрафаваць галоўную рэдактарку Tut.by на 25 500 рублёў.
  • 4 сакавіка судзьдзя Аляксандар Петраш вынес Золатавай прысуд у выглядзе штрафу ў памеры 7 650 рублёў. Таксама яна мусіць сплаціць судовыя выдаткі (на аплату адвакатаў БелТА) ў памеры 6 000 рублёў. Выракам не прадугледжана пазбаўленьне права займаць кіроўныя пасады.
  • Марына Золатава заставалася адзінай абвінавачанай у «справе БелТА».
  • «Справа БЕЛТА»: што адбылося. Раніцай 7 жніўня супрацоўнікі Сьледчага камітэту прыйшлі зь ператрусамі ў офісы інтэрнэт-парталу Tut.by і інфармацыйнага агенцтва БелаПАН, а таксама ў кватэры журналістаў гэтых кампаній. Сьледчы камітэт завёў крымінальную справу за несанкцыянаваны доступ да кампутарнай інфармацыі — платнай падпіскі БелТА (ч. 2 арт. 349 КК).
  • 7–9 жніўня затрымалі 18 журналістаў. Іх вызвалялі пасьля допыту. Пазьней сьледчы камітэт паведаміў, што ў справе 15 фігурантаў.
  • Да канца лістапада крымінальныя справы супраць 14 абвінавачаных спынілі, бо яны сплацілі шкоду і штраф. Акрамя штрафаў, журналісты былі абавязаныя кампэнсаваць прычыненую дзяржаве шкоду. Сумы, выплачаныя былымі фігурантамі «справы БелТА», вагаліся ад 3 да 17 тысяч рублёў.
  • Галоўную рэдактарку TUT.BY абвінавачваюць паводле часткі 2 артыкулу 425 Крымінальнага кодэксу Рэспублікі Беларусі («Бязьдзейнасьць службовай асобы»). Санкцыя артыкулу — ад штрафу да 5 гадоў пазбаўленьня волі.
  • Справу Золатавай вядзе судзьдзя Аляксандар Петраш, які, паводле праваабарончага цэнтру «Вясна», неаднаразова выносіў палітычна матываваныя прысуды вядомым палітыкам, грамадзкім дзеячам і актывістам.
  • Першапачаткова Марына Золатава таксама падазравалася паводле часткі 2 артыкулу 349 («Несанкцыянаваны доступ да кампутарнай інфармацыі») КК Беларусі. Менавіта па гэтым артыкуле былі абвінавачаныя астатнія фігуранты справы. Але такое абвінавачаньне з Золатавай зьнялі.
  • Сьледчы камітэт Беларусі двойчы адмовіў на хадайніцтвы Золатавай аб спыненьні крымінальнага перасьледу.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG