Лінкі ўнівэрсальнага доступу

Вынесены прысуд камандзірам Аляксандра Коржыча. ВІДЭА


Старшы лейтэнант Павал Сукавенка (зьлева) і прапаршчык Артур Вірбал у судзе, 19 кастрычніка 2018 году
Старшы лейтэнант Павал Сукавенка (зьлева) і прапаршчык Артур Вірбал у судзе, 19 кастрычніка 2018 году

Старшага лейтэнанта Паўла Сукавенку і прапаршчыка Артура Вірбала судзілі па асобнай справе.

19 кастрычніка Менскі абласны суд агучыў вырак па справе былых камандзіраў роты, у якой служыў Аляксандар Коржыч. Суд прызнаў іх вінаватымі ў перавышэньні ўлады. Камандзіра роты, старшага лейтэнанта Паўла Сукавенку прыгаварылі да 6 гадоў пазбаўленьня волі. Ягонага намесьніка, прапаршчыка Артура Вірбала — да 4 гадоў пазбаўленьня волі.

Менавіта такое пакараньне на судзе прасіў пракурор. Таксама іх абодвух пазбавілі вайсковых званьняў.

Працэс у справе Паўла Сукавенкі і Артура Вірбала пачаўся 1 кастрычніка, яе разглядаў Менскі абласны суд. Абодва падсудныя камандавалі ротай, у якой служыў Аляксандар Коржыч. Сукавенка — адзіны афіцэр, якога асудзілі пасьля сьмерці Коржыча. На працэсе па факце сьмерці салдата ён выступаў у якасьці сьведкі.

Сукавенку і Вірбала абвінавачвалі ў перавышэньні ўлады, альбо ў бязьдзеяньні ўлады паводле частак 1 і 2 артыкула 455 Крымінальнага кодэксу. Паводле вэрсіі сьледзтва, яны неаднаразова білі падначаленых ім сяржантаў, а таксама вымагалі ў іх прадукты харчаваньня і цыгарэты. Акрамя гэтага, Сукавенку абвінавачваюць у прысваеньні часткі грашовых сродкаў, якія ён павінен быў выдаваць падначаленым салдатам і сяржантам.

У судзе
У судзе

Сваю віну Артур Вірбал прызнаў цалкам. Павал Сукавенка адмаўляе, што ягоныя дзеяньні былі накіраваныя на замацаваньне ўласнага аўтарытэту і прыніжэньне падначаленых.

Прысуд па справе аб сьмерці Аляксандра Коржыча вынесуць 5 лістапада. На лаве падсудных трое сяржантаў роты Коржыча — Яўген Бараноўскі, Антон Вяжэвіч і Ягор Скуратовіч. Усе яны прызнаныя пацярпелымі па справе Сукавенкі і Вірбала.

Справа Аляксандра Коржыча. Што важна ведаць

3 кастрычніка 2017 году 21-гадовага радавога Аляксандра Коржыча знайшлі ў пятлі са зьвязанымі нагамі і надзетай на галаву майкай ў склепе мэдроты вайсковай часткі ў Печах пад Барысавам. Некалькі саслужыўцаў Коржыча на паседжаньні паведамілі, што чулі, быццам майка была абматаная скотчам.

5 кастрычніка ў якасьці першапачатковай вэрсіі сьледзтва назвала суіцыд, але сваякі і сябры Аляксандра Коржыча з гэтай вэрсіяй не пагадзіліся і перадалі ў рэдакцыю Свабоды фатаздымкі ягонага цела са сьлядамі прыжыцьцёвых траўмаў.

Што такое Печы і чаму адтуль шмат кепскіх навінаў?

Справа атрымала вялікі рэзананс у грамадзтве, яна знаходзілася на асабістым кантролі ў Аляксандра Лукашэнкі. Расьсьледаваньне цягнулася каля 9 месяцаў.

Асноўныя факты пра справу Аляксандра Коржыча. Відэа
пачакайце

No media source currently available

0:00 0:01:58 0:00

У выніку сьледзтва прыйшло да высновы, што Аляксандра Коржыча давялі да самагубства таварышы па службе, абвінавачаньні прад’яўленыя больш як 15 асобам. Сьвятлана Коржыч катэгарычна ня згодная з высновамі сьледзтва. На думку жанчыны, яе сына забілі, а прычынай гэтага стала нежаданьне Коржыча плаціць таварышам па службе грошы.

Пацярпелымі ў справе, акрамя сваякоў Аляксандра Коржыча, прызнаныя больш за 50 яго былых саслужыўцаў.

Пяць рэчаў, якія трэба ведаць пра справу Аляксандра Коржыча

Гвалтоўная сьмерць у Печах салдата Аляксандра Коржыча атрымала ў грамадзтве вялікі рэзананс. Былыя салдаты тэрміновай службы пачалі расказваць пра свой досьвед дзедаўшчыны і гвалту ў войску. Стала пашырацца інфармацыя пра іншыя выпадкі сьмерці маладых салдат.

Пасьля здарэньня ў вайсковай частцы ў Печах апыталі 18 тысяч дэмабілізаваных вайскоўцаў на прадмет нестатутных дачыненьняў падчас службы ў войску.

У першым паўгодзьдзі ў Беларусі асудзілі 28 асобаў паводле крымінальных спраў аб нестатутных адносінах. Усе судовыя пастановы набылі законную сілу.

Беларускае войска імя Аляксандра Коржыча. Храналёгія падзей

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG