Камітэт уратаваньня мэмарыялу Курапаты разьмясьціў на плятформе change.org пэтыцыю «Музэй сталінскіх рэпрэсій, а не „кабак“!».
Аўтары абураныя чарговым наступам на Курапаты праз спробу адкрыцьця 1 чэрвеня рэстарацыі «Поедем поедим» на базе забаўляльнага комплексу, які раней меў назву «Бульбаш-хол».
Замест «Бульбаш-холу»: каля Курапатаў адчыняць рэстарацыю «Поедем поедим»
У пэтыцыі выказаныя патрабаваньні да ўладаў:
- тэрмінова скасаваць усе дазволы на існаваньне гэтай рэстарацыі, якія зьяўляюцца незаконнымі з самага пачатку будаўніцтва;
- пакінуць ахоўныя зоны (у тым ліку зоны рэгуляванай забудовы) для патрэб мэмарыялу першай катэгорыі міжнароднай значнасьці, якімі зьяўляюцца Курапаты, месца згубы ахвяраў сталінскага тэрору;
- на базе пабудаванага комплексу адкрыць музэй ахвяраў сталінскіх рэпрэсій, а не „кабак“;
- спыніць зьдзекі над памяцьцю закатаваных ахвяраў сталінскага тэрору; паважліва ставіцца да памяці рэпрэсаваных.
Як стала вядома Свабодзе, 1 чэрвеня плянуецца адкрыцьцё рэстарацыі «Поедем поедим» за 50 мэтраў ад курапацкага мэмарыялу ў комплексе будынкаў, які раней атрымаў назву «Бульбаш-хол» і належыць кампаніі «БелРэстІнвэст».
Што абаронцы Курапатаў будуць рабіць з «новым Бульбаш-холам». ВІДЭА
30 траўня ў Менску абаронцы Курапатаў правялі экстраную нараду «усіх, гатовых спыніць новы „Бульбаш-хол“». Яны вызначылі плян дзеяньняў на найбліжэйшыя дні.
31 траўня
- Збор а 10-й з Ганнай Шапуцькай каля аблвыканкаму, затым паход у Міністэрства культуры.
- Збор а 20-й з Вольгай Мікалайчык каля Крыжа Пакутаў з тымі, хто гатовы ночыць ва ўрочышчы са зьнічамі.
1 чэрвеня
- Агульны збор аб 11-й ля Крыжа Пакутаў і спроба патрапіць на адкрыцьцё рэстарацыі «Поедем поедим».
2 чэрвеня
- Папярэдне збор а 12-й ці 13-й і ўстаноўка намётаў.
3 чэрвеня
- У прамежку з 13.00 да 16.00 адбудзецца афіцыйна дазволены мітынг-рэквіем КХП-БНФ.
4 чэрвеня
- Збор аргкамітэту і выпрацоўка стратэгічнага пляну дзеяньняў.
3 чэрвеня ў Курапатах заплянаваны мэмарыяльны мітынг, заяўнікам якога выступіла Кансэрватыўна-хрысьцянская партыя БНФ.
Як зьявіўся «Бульбаш-хол»
Будоўля «Бульбаш-холу» пачалася ў 2012 годзе ў межах ахоўнай зоны. Пасьля зваротаў грамадзкасьці дзяржаўныя ўстановы выявілі парушэньні пры будаўніцтве, і яно было спыненае. Аднак у 2015 годзе Міністэрства культуры скараціла ахоўную зону Курапатаў са 120 да 50 мэтраў, і «Бульбаш-хол» трапіў у зону рэгуляванай забудовы, дзе будаваць можна з улікам пэўных нюансаў. Пратэсты грамадзкасьці, звароты ў суд і пракуратуру плёну не далі.
Пазьней паведамлялася, што «Бульбаш-хол» зьмяніў назву на «Банкет-хол». Але рэстаранна-забаўляльны комплекс каля Курапатаў так і не адкрыўся.
Асноўнае пра Курапаты
Грамадзкасьць прапаноўвала дзяржаве выкупіць комплекс і перадаць яго на балянс Беларускага саюзу мастакоў «дзеля творчай дзейнасьці ў інтарэсах Курапатаў». А таксама «сесьці за круглы стол з уладальнікамі гэтага аб’екта і падумаць, разабрацца, як гэта зрабіць, каб і бізнэс захаваць, і не парушаць маральных нормаў, якія там павінны быць захаваныя».
16 лютага 2017 году, грамадзкасьць распачала абарону Курапатаў супраць будаўніцтва ў іншым месцы бізнэс-цэнтру прыватным прадпрыемствам «Белрэканструкцыя». Будаўнічая пляцоўка разьмясьцілася за некалькі дзясяткаў мэтраў ад курапацкіх крыжоў, на плошчы, якая ўваходзіла ў ахоўную зону Курапатаў. Гэты кавалак зямлі Менгарвыканкам прадаў прадпрымальнікам, скараціўшы межы ахоўнай зоны ўрочышча.
Супрацьстаяньне будаўнікоў і грамадзкасьці доўжылася больш за месяц і завяршылася перамогай апошніх: прадпрыемства «Белрэканструкцыя» адмовілася ад будаўніцтва. Але шмат каго з абаронцаў затрымалі, судзілі і аштрафавалі.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што пад іх падпалі як мінімум 600 тысяч чалавек. Паводле іншых ацэнак гэтая лічба дасягае 1,4 мільёна. Але дакладныя лічбы не вядомыя — КДБ дагэтуль не раскрыла архівы. Паводле розных падлікаў ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
