Лінкі ўнівэрсальнага доступу

Статкевіч падчас вызваленьня з турмы казаў: «Дайце нам даседзець!»


Мікола Статкевіч ля турмы на Акрэсьціна (архіўнае фота)
Мікола Статкевіч ля турмы на Акрэсьціна (архіўнае фота)

25 сакавіка Міколу Статкевіча затрымалі аб 11 гадзіне пры выхадзе са свайго дома ў Лошыцы. Адвезьлі спачатку ў Ленінскае РУУС, а потым у турму на Акрэсьціна, дзе палітыка пратрымалі 8 гадзін, а ўвечары нечакана вызвалілі разам з Уладзімерам Някляевым, Вячаславам Сіўчыкам, Максімам Вінярскім, Яўгенам Афнагелем, Леанідам Кулаковым.

Да 25 сакавіка палітык Мікола Статкевіч 8 дзён не выходзіў з хаты, бо цэлы квартал быў заблякаваны міліцэйскімі машынамі. Двойчы міліцыянты грукалі ў брамку, але ніхто не выходзіў, а ўрывацца ў хату яны не адважыліся.

Палітык спадзяваўся на незалежных журналістаў, напісаў у «Фэйсбуку», каб яго суправадзілі раніцай 25 сакавіка да плошчы Якуба Коласа. Але ня ўсе змаглі дабрацца: раніцай быў заблякаваны ня толькі квартал, дзе жыве Статкевіч, але і ўезд з вуліцы Маякоўскага на вуліцу Чыжэўскіх.

«Калі мяне везьлі ў пастарунак, я бачыў, што на павароце з Маякоўскага на Чыжэўскіх павесілі „цагліну“, а гэта вуліца даволі ажыўленая, па ёй ходзіць цывільны транспарт. Да майго дома здолелі даехаць нейкім чынам журналісты „Эўраньюс“ і журналіста „Белсату“ нехта давёў літаральна „агародамі“. Калі я выйшаў з дому, выезд з варотаў быў заблякаваны міліцэйскай машынай, я спрабаваў трапіць у таксоўку да „Эўраньюс“. Мяне затрымалі. Жонка паднесла падрыхтаваныя для турмы рэчы, я пачаў крычаць, каб яна ішла назад, але яе таксама прымусілі сесьці ў машыну», — расказаў Мікола Статкевіч.

Прывезьлі іх у Ленінскае РУУС, патлумачылі, што ён не адседзеў тэрмін 10 сутак, які яму прысудзіў суд Маскоўскага раёну яшчэ ў кастрычніку — «за несанкцыянаваны пікет каля Цэнтру ізаляцыі правапарушальнікаў на Акрэсьціна ў выглядзе інтэрвію „Белсату“».

Марыну Адамовіч адпусьцілі, калі яна пачала здымаць на тэлефон. На акцыю на плошчу Якуба Коласа Марына спазьнілася, бо ў ейнай машыне нажом былі парэзаныя шыны. Тое самае адбылося і з машынай «Опэль» 2002 году, якая належыць бацьку Статкевіча. Колы настолькі сапсаваныя, што аднаўленьню не падлягаюць.

Ну а Статкевіча зь міліцыі Ленінскага раёну павезьлі ў турму на Акрэсьціна.

«Пасадзілі мяне ў камэру са „стукачом“. 8 гадзін я адседзеў там, а потым кажуць: „З рэчамі на выхад. Падумаў, што вызваляюць камэру для арыштаваных пасьля акцыі. Калі я выйшаў, убачыў Кулакова, Вінярскага ды іншых. Атрымліваецца, што я адседзеў 8 гадзін з 10 сутак.

Я ўчыніў скандал: маўляў, мне трэба адбыць 240 гадзін, калі я буду адседжваць па 8 гадзін, мяне будуць 30 разоў арыштоўваць?“ Там усе пратэставалі — „Дайце нам даседзець“. Таму, шчыра кажучы, ня радуе гэтае вызваленьне нікога з нас».

Статкевіч кажа, што цяпер яго блізкім давядзецца жыць у напружаньні ўвесь час, бо ў любы момант могуць зноў забраць. Да таго ж на Статкевіча складзены пратакол за заклікі выйсьці на акцыю 25 сакавіка.

#БНР100 у Беларусі і сьвеце. ЖЫВЫ БЛОГ

На Дзень Волі ў Беларусі затрымалі больш за 100 чалавек. Некаторых чакаюць суды

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG