Грыгоры Родчанкаў, былы кіраўнік Маскоўскай антыдопінгавай лябараторыі, які распавёў аб расейскай дзяржаўнай праграме допінгу ў спорце, сустрэўся 23 сакавіка ў Вашынгтоне з амэрыканскімі заканадаўцамі — сябрамі Камісіі па бясьпецы і супрацоўніцтве ў Эўропе (Хэльсынская камісія).
Паводле афіцыйнага прэс-рэлізу аб сустрэчы, размова на ёй ішла ня толькі пра допінг, але і пра «карупцыю ў міжнародных спартыўных фэдэрацыях», а таксама пра «пагрозу, якую Расея ўяўляе для ЗША».
У сустрэчы ўдзельнічалі сэнатары Коры Гарднэр і Бэн Кардын. На фатаграфіі з сустрэчы, распаўсюджанай у інтэрнэце, Родчанкаў сядзіць за сталом у цёмных акулярах і балаклаве, якая хавае большую частку ягонага твару.
Сэнатар Кардын пасьля сустрэчы заявіў, што Родчанкаў, які нядаўна зьмяніў зьнешнасьць, баіцца за сваё жыцьцё, што, па словах сэнатара, апраўдана пасьля атручваньня ў Вялікай Брытаніі былога супрацоўніка ГРУ Сяргея Скрыпаля. Сам Родчанкаў у інтэрвію ВВС у лютым 2018 году таксама казаў, што ягонае жыцьцё знаходзіцца пад пагрозай. У лістападзе 2017 году ганаровы прэзыдэнт Алімпійскага камітэту Расеі Леанід Цягачоў заявіў, што «Родчанкава трэба за няпраўду расстраляць, як Сталін бы зрабіў».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў