Ня ўсё толькі благое адбываецца на белым сьвеце і трапляе ў стужку навінаў — і ў новай рубрыцы кожную суботу Свабода будзе нагадваць пра аптымістычныя, станоўчыя, пазытыўныя падзеі тыдня.
Беларускі заваявалі залаты і срэбны мэдалі на Алімпіядзе ў Пхёнчхане
Як беларускія біятляністкі перамаглі ў алімпійскай эстафеце. Фотагалерэя
17 лютага беларуская біятляністка Дар’я Домрачава фінішавала другой у алімпійскай гонцы з масавым стартам. А 22 лютага беларускія біятляністкі Надзея Скардзіна, Ірына Крыўко, Дзінара Алімбекава і Дар’я Домрачава выйгралі алімпійскую эстафэту. Гэта другое золата для зборнай Беларусі, Фрыстайлістка Ганна Гуськова прынесла першае золата Беларусі ў Пхёнчхане.
Праваабаронца Алена Танкачова вярнулася ў Беларусь
Пасьля трохгадовай высылкі 22 лютага праваабаронца Алена Танкачова вярнулася ў Беларусь. У 2014 годзе яе пазбавілі віду на жыхарства (Алена — грамадзянка Расеі, жыве ў Беларусі 30 гадоў, з маленства) і дэпартавалі на 3 гады. Афіцыйная падстава — штрафы за перавышэньне хуткасьці. Праваабарончая супольнасьць лічыць высылку Алены Танкачовай помстай за яе прафэсійную дзейнасьць. Як сказала Алена ў эксклюзіўным інтэрвію Свабодзе, цяпне яны падаваць дакумэнты, каб атрымаць беларускае грамадзянства.
На Берасьцейшчыне зь нетраў возера паднялі вайсковы рыштунак часоў ВКЛ
Экспэдыцыя супрацоўнікаў Інстытуту гісторыі Нацыянальнай акадэміі навук разам з дайвінг-цэнтрам «Марскі пэгас» працавала на месцы старажытнай умацаванай рэзыдэнцыі магнатаў Вішнявецкіх у вёсцы Жа́бер Драгічынскага раёну. Яны намацалі і падняць удалося 38-кіляграмовыя марцірныя бомбы, драўляныя завостраныя палі (штурмфалы), якія выкарыстоўваліся як элемэнты абароны вала замка і захаваліся ў глеі ад гніеньня. Выяўленыя таксама элемэнты пад’ёмнага моста, брамы — кавалкі цэглы, муроў, іншыя аскепкі. Паводле навукоўцаў, падобнай калекцыі артэфактаў на тэрыторыі Эўропы сёньня няма. Журналісты Свабоды прысутнічалі на месцы падзеі і зрабілі ўнікальныя фотаздымкі.
«Галасы ўтопіі» Сьвятланы Алексіевіч выдадуць па-беларуску без цэнзуры
Кнігарня «Логвінаў» два гады працавала над цыклем кніг ляўрэаткі Нобэлеўскай прэміі ў літаратуры Сьвятланы Алексіевіч на беларускай мове, плянуе выдаць бяз цэнзарскіх правак кнігі «У вайны не жаночы твар» (пераклаў Валянцін Акудовіч), «Чарнобыльская малітва» (пераклаў Уладзімер Арлоў), «Апошнія сьведкі» (пераклаў Барыс Пятровіч), «Цынкавыя хлопчыкі» (пераклаў Андрэй Хадановіч) і «Час сэканд-хэнд» (пераклаў Сяргей Дубавец) Пастаўкі чакаюцца ў траўні 2018 году. Збор грошай на калекцыйнае выданьне пачаўся на сайце Ulej.by.
SpaceX запусьціла ў космас спадарожнікі для раздачы «сусьветнага інтэрнэту»
Кампанія SpaceX 22 лютага запусьціла ракету-носьбіт Falcon 9 зь першымі спадарожнікамі для раздачы інтэрнэту па ўсім сьвеце. Зь іх дапамогай на ўсёй тэрыторыі Зямлі будзе даступны хуткасны інтэрнэт.
У касьцёле Сьвятога Роху перапахавалі парэшткі Магдалены Радзівіл
Нашчадкі арыстакраткі і мэцэнаткі выканалі яе апошнюю волю — быць пахаванай у Менску. На пахаваньне прыехалі Мацей і Мікалай Радзівілы, праўнукі Марылена і Адам Замойскія. Магдалена Радзівіл памерла ў 1945 годзе ў швайцарскім Фрыбуры, дзе яна была пахаваная да 2017 году. У лютым 2017-га яе парэшткі эксгумавалі і адправілі ў крэматорый. У ліпені 2017 году ўрну з прахам прывёз у Беларусь Аляксандар Сапега, намесьнік старшыні Асацыяцыі беларусаў Швайцары.