Лінкі ўнівэрсальнага доступу

Экскурсавод ініцыяваў перадрук старых паштовак зь відамі беларускіх гарадоў


Горадня на старой паштоўцы

На краўдфандынгавай плятформе «Талака» распачаты збор сродкаў на перадрук 300 старых (да 1939 году) паштовак з выявамі беларускіх гарадоў.

Выданьне паштовак дазволіць вярнуць іх ва ўжытак і тым самым папулярызаваць гісторыю — як сярод беларусаў, так і сярод замежнікаў, паспрыяе адраджэньню памяці, гістарычных повязяў, кажа ініцыятар ідэі, гісторык, экскурсавод, стваральнік праекту «Вандроўкі ў мінулае» Павал Дзюсекаў.

Павал Дзюсекаў, архіўнае фота
Павал Дзюсекаў, архіўнае фота

«Ідэя зьявілася з таго, што я ваджу экскурсіі, і самыя якасныя ілюстрацыі, якія найлепш сьведчаць, як выглядаў горад, — гэта якраз старыя паштоўкі, — кажа Павал Дзюсекаў. — Яны фотагенічныя і прыгожыя, а яшчэ — вяртаюць гістарычную повязь. На гэты момант назьбіралася пад 300 штук, кожнай будзе выдадзена па 100 асобнікаў. Перш чым пачаць, у суполках «Вандроўкі ў мінулае» ў сацсетках я пацікавіўся ў людзей, ці ім гэта цікава, ці хочуць яны ў гэтым удзельнічаць, і знайшоў падтрымку. Так ідэя перакрочыла на „Талаку“».

Геаграфія паштовак шырокая, хоць асноўная ўвага ўсё ж аддадзена Менску. Акрамя яго, у пераліку Бабруйск, Баранавічы, Берасьце, Віцебск, Горадня, Дзьвінск, Кобрынь, Ліда, Магілёў, Наваградак, Нясьвіж, Пінск, Слонім — усяго каля 20 гарадоў. Праз «вакенца» паштоўкі надзвычай цікава зірнуць, як жылі нашы продкі ў сваіх гарадах, кажа Павал Дзюсекаў.

«Навошта гэта робіцца? Рэч у тым, што я пахадзіў па сувэнірных крамах і паглядзеў, што прапануюць выдавецтвы. Паштоўкі клясныя, проста я па-іншаму гэта ўсё бачу. Я не хацеў ніяк іх апрацоўваць, хай будзе так, як было некалі. То бок калі 100 гадоў таму нехта некага віншаваў з Калядамі, то хай надпіс і застанецца. Мы з дызайнэрам зрабілі ў мінімалісцка-мадэрнісцкім стылі адваротны бок, каб людзі маглі дасылаць праз пошту. Такім чынам праз падарункі сябрам, праз посткросінг яны разыдуцца ня толькі па Беларусі, але і па сьвеце», — кажа Павал Дзюсекаў.

Паводле ягоных слоў, перавыданьне паштовак — некамэрцыйны праект, прадавацца яны ня будуць. Замовіць іх можна ў межах краўдфандынгавай кампаніі, таксама яны будуць раздавацца турыстам падчас «Вандровак у мінулае».

«Тыя людзі, якія замовяць паштоўкі на „Талацэ“ сваімі ахвяраваньнямі, атрымаюць іх як падарунак. А ўсё астатняе будзе разыходзіцца праз мае экскурсіі. Калі я зьбіраю людзей на бясплатныя вандроўкі, каб інтэлектуальна „разьмяцца“, прапаную адгадваць загадкі. І гэта будзе ўзнагарода за правільныя адказы. Бо людзі ўсё жыцьцё жывуць у горадзе, але калі паказваеш карцінку таго самага месца, толькі 100 гадоў таму, яны ўжо не ўяўляюць, наколькі радыкальна ўсё зьмянілася. На жаль, паміж Менскам узору 2018 году і 1918-га — істотная пярэрва».

Інстаграм 100-гадовай даўніны. Як нямецкі фатограф зарабляў на беларускіх краявідах

XS
SM
MD
LG