Лінкі ўнівэрсальнага доступу

Нацыяналіст, добраахвотнік, карупцыянэр. Што вядома пра ўкраінскага дэпутата, параненага ў выніку выбуху ў Кіеве


Ігар Масійчук падчас пасяджэньня Вярхоўнай Рады Ўкраіны 3 верасьня 2015 году

Праз выбух, які адбыўся напярэдадні амаль у цэнтры ўкраінскай сталіцы, загінулі дзьве асобы і пяцёра параненыя, сярод якіх народны дэпутат Украіны Ігар Масійчук і палітоляг Віталь Бала.

Сёлета гэта ўжо трэці выпадак, зьвязаны з падкладзенай у транспарт выбуховаю прыладаю — у чэрвені загінуў супрацоўнік галоўнага ўпраўленьня выведкі Міністэрства абароны Ўкраіны Максім Шапавала, а ў верасьні — грамадзянін Грузіі Тымур Махауры, які на баку ўкраінскай улады ваяваў на Данбасе ў складзе добраахвотніцкага батальёну імя Джахара Дудаева. Летась у ліпені ў выніку выбуху аўтамабіля загінуў беларускі журналіст Павал Шарамет.

Паплечнік Алега Ляшка і вэтэран «Азова»

Ігар Масійчук пасьля абраньня ў 2014 годзе ў парлямэнт паводле сьпісаў Радыкальнай партыі Алега Ляшка быў прызначаны першым намесьнікам старшыні камітэту ў пытаньнях заканадаўчага забесьпячэньня праваахоўнай дзейнасьці. У Вярхоўную Раду Ўкраіны ён прыйшоў фактычна з фронту, дзе ваяваў у складзе добраахвотніцкага батальёну «Азоў» і быў намесьнікам камандзіра.

Ігар Масійчук. Архіўнае фота 2015 году
Ігар Масійчук. Архіўнае фота 2015 году

З маладых гадоў Ігар Масійчук быў актыўным удзельнікам нацыянальна арыентаваных грамадзкіх арганізацый — у 22 гады ён далучыўся да праварадыкальнай арганізацыі «УНА-УНСО», а пазьней — да партыі «Свабода» і Сацыял-нацыянальнай асамблеі. Выбіраўся дэпутатам у гарадзкую раду ў Васількове (горад у 25 кілямэтрах ад Кіева). І менавіта ў гэтым статусе ў яго пачаліся першыя праблемы з уладаю.

Улады Януковіча лічылі Масійчука тэрарыстам

У жніўні 2011 году Ігара Масійчука разам зь іншым дэпутатам Васількоўскай гарадзкой рады затрымалі супрацоўнікі Службы бясьпекі Ўкраіны паводле абвінавачаньня ў падрыхтоўцы тэракту — яны нібыта плянавалі падарваць помнік Леніну ў Барыспалі (хоць на той момант помнік ужо быў дэмантаваны паводле рашэньня мясцовых уладаў) і рыхтавалі тэракт у Кіеве на Дзень Незалежнасьці. Тады ён ўпершыню трапіў у вязьніцу і быў асуджаны на шэсьць гадоў пазбаўленьня волі.

Ігар Масійчук ва ўкраінскай студыі Радыё Свабода. 2 чэрвеня 2017 году
Ігар Масійчук ва ўкраінскай студыі Радыё Свабода. 2 чэрвеня 2017 году

Фактычна з гэтай справы ў часы прэзыдэнцтва Віктара Януковіча пачалася сэрыя сфабрыкаваных спраў ды правакацый супраць актывістаў сацыял-нацыяналістычнага руху.

Ігар Масійчук разам са сваімі паплечнікамі быў вызвалены ўжо пасьля падзеяў на Майдане — у лютым 2014 году Вярхоўная Рада ўхваліла закон аб рэабілітацыі палітычных вязьняў, а ў студені 2015-га апэляцыйны суд Кіеўскай вобласьці апраўдаў усіх і прызнаў невінаватымі.

Новая справа пры новай уладзе

У верасьні 2015 году тагачасны генэральны пракурор Украіны Віктар Шокін прадэманстраваў на паседжаньні парлямэнту відэа, на якім дэпутат-радыкал нібыта атрымліваў хабар за дапамогу ў прадпрымальніцкай дзейнасьці. Тады ж дэпутаты падалі прашэньне пракуратуры аб пазбаўленьні Ігара Масійчука дэпутацкай недатыкальнасьці і ягоным арышце. Праз гадзіну ён быў затрыманы і выведзены з будынка парлямэнту сіламі двух дзясяткаў супрацоўнікаў СБУ. Супраць Ігара Масійчука выставілі абвінавачаньні адразу паводле пяці артыкулаў Крымінальнага кодэксу Ўкраіны — атрыманьне хабару, хуліганства, пагроза або гвалт у дачыненьні да службовай асобы, умяшаньне ў дзейнасьць судовых органаў і гвалт у дачыненьні да судзьдзі.

Ігара Масійчука выводзяць з будынка Вярхоўнай рады сіламі двух дзясяткаў супрацоўнікаў СБУ
Ігара Масійчука выводзяць з будынка Вярхоўнай рады сіламі двух дзясяткаў супрацоўнікаў СБУ

У сваю чаргу Ігар Масійчук назваў гэтыя абвінавачаньні сфальсыфікаванымі і асабістаю помстаю генэральнага пракурора за намер дэпутата абнародаваць доказы віны Віктара Шокіна ў выкраданьні матэрыялаў справы Георгія Гангадзэ і фальсыфікацыі некалькіх іншых спраў.

Аднак у лістападзе 2015 году Вышэйшы адміністрацыйны суд Украіны прызнаў незаконнай і адмяніў пастанову Вярхоўнай Рады аб зьняцьці недатыкальнасьці і арышце Ігара Масійчука.

Скандаліст

Зь імем Ігара Масійчука зьвязваюць шэраг скандалаў.

У канцы лютага 2014 году, калі ў Крыме пачалі арганізацыю рэфэрэндуму аб незалежнасьці і далучэньні да Расеі, Ігар Масійчук паабяцаў адправіць на паўвостраў «цягнік дружбы»: «Мы, як у 90-м УНСО, паедзем у Крым, і тады публіка, падобная гэтай, як пацукі ўцякала, калі калёна унсоўцаў уваходзіла ў Сэвастопаль. Саборнасьць ёсьць адной з нашых самых вялікіх каштоўнасьцяў». Пазьней дасьледчыкі аналітычнага цэнтру RAND прызналі гэтую заяву каталізатарам крымскага крызісу.

Пасяджэньне Вярхоўнай Рады Ўкраіны. Дэпутаты Вярхоўнай Рады ад Радыкальнай партыі Алег Ляшко (справа), Ігар Масійчук (у цэнтры) і Сяргей Рыбалка. Кіеў, 16 сакавіка 2016 году
Пасяджэньне Вярхоўнай Рады Ўкраіны. Дэпутаты Вярхоўнай Рады ад Радыкальнай партыі Алег Ляшко (справа), Ігар Масійчук (у цэнтры) і Сяргей Рыбалка. Кіеў, 16 сакавіка 2016 году

У траўні 2014 году ў складзе групы байцоў батальёну «Азоў» Ігар Масійчук пад пагрозай зброі паставіў на калені супрацоўнікаў ДАІ ў Бярдзянску за тое, што яны спынілі аўтамабіль без нумароў, у якім ён ехаў.

Пасьля перастрэлкі ў Грозным, якая адбылася 4 сьнежня 2014 году, украінскі дэпутат заявіў, што «чачэнцы адкрываюць другі фронт». Тады ж кіраўнік Чачэніі Рамзан Кадыраў праз свой Instagram даручыў мясцовым праваахоўным органам распачаць крымінальныя справы ў дачыненьні да Ігара Масійчука за нібыта «аказаньне садзейнічаньня бандыцкім вылазкам». Тады ж Сьледчы камітэт Расеі адкрыў адпаведную крымінальную справу за публічныя заклікі да ажыцьцяўленьня тэрарыстычнай дзейнасьці і публічнае апраўданьне тэрарызму.

Трагедыю ў Адэсе, што адбылася 2 траўня 2014 году, калі ў выніку пажару загінулі 42 прарасейскія актывісты і каля 200 асобаў былі параненыя, Ігар Масійчук назваў «першым пераможным для Ўкраіны боем са спрадвечным ворагам».

Сярод апошніх падзей, у якіх Ігар Масійчук браў удзел, — пасяджэньне Сьвятошынскага раённага суду Кіева, які выбіраў меру стрыманьня для кіраўніка добраахвотніцкага руху «Арганізацыя ўкраінскіх нацыяналістаў» Міколы Каханоўскага, затрыманага за перастрэлку ў Кіеве. Абараняючы Міколу Каханоўскага ад арышту, ягоныя паплечнікі разграмілі залю суду.

Абаронца беларускіх добраахвотнікаў

Ігар Масійчук з часоў свайго ўдзелу ў добраахвотніцкім батальёне «Азоў» падтрымлівае беларускіх добраахвотнікаў, якія змагаліся на баку ўкраінскіх уладаў на Данбасе.

У траўні 2015 года ў інтэрвію тэлеканалу «Белсат» Ігар Масійчук заклікаў беларускую ўладу не перасьледаваць беларусаў, якія дапамагалі Ўкраіне адстойваць тэрытарыяльную цэласнасьць, і абвяргаў, што яны атрымліваюць за гэта вялікія грошы:

«Я мяркую, што спадара Лукашэнку ўводзяць у зман, бо толькі цяпер заканадаўча нармуецца ўдзел замежных добраахвотнікаў ва Ўзброеных сілах, і, адпаведна, добраахвотнікі змогуць скласьці кантракт на праходжаньне вайсковай службы ў шэрагах Узброеных сілаў Украіны. Дагэтуль жа няма такога, каб нехта плаціў 10 тысяч — ня тое што беларускаму добраахвотніку, а любому добраахвотніку, і гэта сьмешна. Відаць, прэзыдэнт Беларусі трапляе ўсё часьцей і часьцей пад уплыў расейскіх мэдыя. Добра яшчэ, што ня кажа, што ў беларускіх добраахвотнікаў ёсць два рабы ў кожнага. Гэта абсурд і няпраўда.

Насамрэч утрымліваюцца яны выключна за кошт валянтэраў. Валянтэры асобна не займаюцца беларускімі добраахвотнікамі, а дапамагаюць усім жаўнерам, сярод якіх ёсьць і беларусы. Я ж займаюся тым, каб украінскія ўлады цанілі тых, хто стаў на абарону краіны, і гарантавалі іхнае прыярытэтнае права пры жаданьні атрымаць украінскае грамадзянства. Але ёсьць і такія, і іх больш, якія хочуць захаваць беларускае грамадзянства і зьвяртаюцца па атрыманьне прыстанішча, бо баяцца рэпрэсіяў з боку ўлады Лукашэнкі. Мяне запэўніваў амбасадар Беларусі, што за ўдзел у вайне на ўсходзе на баку Ўкраіны нікога ня будуць перасьледаваць, але ў той жа час былі і іншыя заявы. Таму людзі кажуць, што крыху баяцца».

Ваша меркаваньне

Паказаць камэнтары

XS
SM
MD
LG