Лінкі ўнівэрсальнага доступу

Фігуранту справы аб бойцы ў менскім мэтро дабавілі «пэдафілію»


Кадры зьбіцьця зь відэа «ЎКантакце», зьнятага Людмілай Сінюк

Цэнтральным раённым аддзелам Сьледчага камітэту Менску завершана расьсьледаваньне крымінальнай справы паводле абвінавачваньня раней судзімага 19-гадовага хлопца ва ўжываньні гвалту ў дачыненьні да супрацоўніка міліцыі.

Пра гэта паведамляе Сьледчы камітэт Беларусі.

Травеньская гісторыя атрымала шырокі розгалас дзякуючы відэа затрыманьня, зробленага і разьмешчанага ў сацсетках жыхаркай Менску Людмілай Сінюк. Інцыдэнт выклікаў грамадзкі рэзананс, пост атрымаў больш за 160 тысяч праглядаў.

На запісе чуваць, як жанчына абураецца дзеяньнямі супрацоўнікаў міліцыі і ахоўнікаў мэтро, у тым ліку праскоквае нецэнзурная лексыка. У чэрвені на падставе гэтага Цэнтральны раённы суд сталіцы пакараў яе за лаянку ў адрас супрацоўнікаў міліцыі (палічыў гэта дробным адміністрацыйным парушэньнем) штрафам у 230 рублёў.

Што тычыцца героя роліка, дык сьледзтвам выяўлена, што малады чалавек знаходзіўся ў вэстыбюлі станцыі «Кастрычніцкая» ў стане алькагольнага ап’яненьня. Калі той спускаўся па эскалятары, на ягоныя паводзіны зьвярнуў увагу супрацоўнік аховы мэтрапалітэну, які папрасіў пасажыра прайсьці ў пакой міліцыі. Хлопец аказаў супраціўленьне, ударыў міліцыянта ў твар. На дапамогу прыйшлі іншыя супрацоўнікі, якія ў выніку яго затрымалі.

Была распачатая крымінальная справа аб гвалце ў дачыненьні да супрацоўнікаў міліцыі і іншых асобаў пры выкананьні імі абавязкаў па ахове грамадзкага парадку.

У часе расьсьледаваньня таксама ўстаноўлена, што абвінавачваны неаднаразова ўступаў у палавую сувязь з асобай, якая не дасягнула 16-гадовага ўзросту. Былі праведзеныя допыты пацярпелых, сьведак, прагледжаныя запісы з камэраў відэаназіраньня.

Канчатковае абвінавачаньне прад’яўлена паводле арт. 364 (гвалт у дачыненьні супрацоўніка АУС), на падставе ч. 2 арт. 363 («супраціў з ужываньнем гвалту ў дачыненьні асобы, якая ахоўвае грамадзкі парадак») і ч. 2 арт. 168 (палавыя зносіны з асобай, якая не дасягнула 16-гадовага ўзросту) Крымінальнага кодэксу Рэспублікі Беларусь.

Справа перададзена пракурору для накіраваньня ў суд.

Ваша меркаваньне

Паказаць камэнтары

XS
SM
MD
LG