У паведамленьні прэс-службы Паўднёвай вайсковай акругі гаворыцца, што Віктар Агееў ня мог падпісаць кантракт з Узброенымі сіламі РФ за чатыры дні, як ён сьцьвярджае ў сваім інтэрвію, таму што на гэта нібыта патрабуецца больш за месяц.
У інтэрвію ўкраінскаму тэлеканалу напярэдадні Агееў паведаміў, што служыць у Новачаркаску, у палку сувязі і навучальным цэнтры Паветрана-касьмічных сілаў Расеі. Ён пацьвердзіў, што ў сакавіку 2017 году прыехаў у Растоўскую вобласьць і падпісаў кантракт на службу ва Ўзброеных сілах Расеі. Паводле яго, ён прыехаў у сваю частку, прабыў там 4 дні, падпісаў кантракт і літаральна адразу быў адпраўлены ў Данбас.
Расеец Віктар Агееў быў затрыманы ўкраінскімі вайскоўцамі ў Луганскай вобласьці. Цяпер ён утрымліваецца ў СІЗА ў Старабельску.
У Мінабароны Расеі сьцьвярджаюць, што Агееў раней служыў у расейскай арміі, але быў звольнены ў запас яшчэ ў траўні 2016 году.
