Лінкі ўнівэрсальнага доступу

«Пасьля даказвай, што ты ня згвалціў нікога і не прывёз марыхуаны», — Данкверт пра адмову ехаць у Беларусь і «харчовую вайну»


Кіраўнік «Рассельгаснагляду» Сяргей Данкверт

Кіраўнік «Рассельгаснагляду» Сяргей Данкверт у інтэрвію маскоўскай газэце «Известия» сказаў, што паміж Расеяй і Беларусьсю няма «харчовай вайны», а таксама распавёў пра крымінальную справу, якую супраць яго загадаў распачаць Аляксандар Лукашэнка, і пашкадаваў, што Расея закрыла пастаўкі толькі з 20 беларускіх прадпрыемстваў.

Сярод іншага Данкверт адказаў, як ідзе расьсьледаваньне ў крымінальнай справе, на завядзеньні якой настойваў Лукашэнка:

«На сёньняшні дзень яны праводзяць нейкія свае мерапрыемствы. Даслалі запыт у Генпракуратуру. Генпракуратура даслала іх пытаньні мне. Я на гэтыя пытаньні даў каманду адказаць. Там пытаньні пастаўленыя так: як вы закрывалі тое ці іншае прадпрыемства? Таму, калі пракуратура будзе разьбірацца ў гэтай справе непрадузята, адзіная прэтэнзія, якая можа да мяне паўстаць, — што я мала закрыў беларускіх прадпрыемстваў і шмат давяраў беларускаму боку. Таму што парушэньняў выяўлена значна больш».

Наконт сваіх сумневаў у бясьпецы паездак у Беларусь для сваіх супрацоўнікаў Данкверт адказаў:

«Нашы інспэктары, якія там працавалі, яшчэ тры гады таму прасілі мяне не пасылаць іх у Беларусь праз нездаровае становішча там. Інспэктары баяцца правакацыяў. Калі кіраўнік рэспублікі робіць такія заявы, то што могуць зрабіць з простым інспэктарам? Потым даказвай, што ты ня згвалціў кагосьці ў гатэлі і не прывёз паўтоны марыхуаны з сабой. Як гэта даказаць у чужой дзяржаве?»

Данкверт прызнаў, што Расея закрыла пастаўкі з 20 беларускіх прадпрыемстваў з 600, якія экспартуюць у Расею мяса і малако.

«Сотні беларускіх фураў штодня перасякаюць расейскую мяжу. Так што ніякай гандлёвай вайны няма.

Калі Беларусь прыме рашэньне нешта не пастаўляць, гэта іх права. У нас простыя патрабаваньні: пастаўляйце прадукцыю бясьпечную і адпаведную тым дакумэнтам, якія вы пішаце. Усяго толькі. Але як мы можам дазваляць пастаўкі, калі вы везяце ўкраінскую прадукцыю, а кажаце, што яна беларуская? Была б іншая краіна, а не Беларусь, мы б даўно закрылі наогул усе пастаўкі. Проста закрылі б усё: мяса, гародніну і садавіну.

Прадукцыі зь Беларусі паступае да нас вялікая колькасьць. І той аб’ём, які мы адлоўліваем, — добра калі 10%. Мы цяпер закрылі Менскую вобласьць для таго, каб беларускі бок разабраўся і зрабіў захады. Але нічога ня робіцца. І я не выключаю, што за Менскай вобласьцю мы закрыем пастаўкі яшчэ зь якой-небудзь, дзе выявім кантрафакт або кантрабанду».

***

«Харчовая вайна» паміж Расеяй і Беларусьсю абвастрылася ў пачатку 2017 году. Падчас «Вялікай размовы з прэзыдэнтам» 3 лютага Лукашэнка выказаўся наконт прэтэнзіяў Масквы да беларускіх прадуктаў і нават паабяцаў распачаць крымінальную справу супраць кіраўніка Рассельнаснагляду Сяргея Данкверта за «нанясеньне шкоды дзяржаве».

З 4 па 6 лютага 2017 году «Рассельгаснагляд» у Бранскай і Смаленскай абласьцях забараніў увоз больш як 37 тон ялавічыны зь беларускіх мясакамбінатаў у Любані і Магілёве.

З 6 лютага Рассельгаснагляд увёў часовыя абмежаваньні на пастаўкі ялавічыны і ялавічных субпрадуктаў з усіх прадпрыемстваў Менскай вобласьці Беларусі, а таксама некаторых з Магілёўскай вобласьці. Сярод прычын называліся падазрэньні ў тым, што беларускія прадпрыемствы прадаюць у Расею мяса ўкраінскага паходжаньня.

8 лютага Рассельгаснагляд паведаміў, што ў студзені на мяжы спынены ўвоз зь Беларусі ў Расею больш як 40 партыяў малочнай і мясной прадукцыі беларускага паходжаньня.

9 лютага Рассельгаснагляд распаўсюдзіў заяву пра адкладаньне візыту сваіх спэцыялістаў у Беларусь, якія меліся праверыць месцы захоўваньня і вытворчасьці расьліннай прадукцыі. Прычына адкладаньня візыту — магчымыя «правакацыйныя дзеяньні зь беларускага боку».

14 лютага Рассельгаснагляд пашырыў сьпіс беларускіх прадпрыемстваў, якім абмежаваная пастаўка прадукцыі ў Расею.

Ваша меркаваньне

Паказаць камэнтары

XS
SM
MD
LG