Лінкі ўнівэрсальнага доступу

Данкверт наконт заявы Лукашэнкі: калі табе пагражае прэзыдэнт, тым больш Беларусі, што ты можаш зрабіць?


Сяргей Данкверт

Кіраўнік Рассельгаснагляду Сяргей Данкверт лічыць загад Аляксандра Лукашэнкі распачаць супраць яго крымінальную справу ціскам ня толькі на яго ведамства, але наогул на ўсіх расейскіх чыноўнікаў.

У інтэрвію РБК Данкверт заявіў, што засмучаны прэтэнзіямі беларускага кіраўніцтва.

«Вы ж ведаеце, любы чалавек, якому пагражаюць, спачатку думае, што гэта ўсё ня так, потым пачынае думаць: а як жа наогул рэагаваць? Але, я вам скажу, у дадзеным выпадку я ўсё ж такі разглядаю гэта як не зусім карэктныя меры аказаньня ціску ў цэлым на службу. Калі ўзяць у маштабе вялікім, усёй краіны, то [гэта ціск] на ўсіх чыноўнікаў нашай краіны. Чаму? Таму што, уявіце, быў Баўмгертнер, потым Данкверт. Тым людзям, якія маюць такія прозьвішчы, а ў нас шмат хто і ў «Сбербанку» маюць прозьвішчы такія — нямецкага напрамку, трэба баяцца.

На пытаньне журналістаў, як Данкверт будзе рэагаваць на сытуацыю з крымінальнай справай у Беларусі, кіраўнік расейскага ведамства заявіў:

«А што можа зрабіць чалавек супраць прэзыдэнта? Тым больш Беларусі. Што можа зрабіць просты [чалавек], нават кіраўнік? У лепшым выпадку трэба піць заспакаяльнае на ноч, у адваротным — проста скончыць жыцьцё самагубствам. Таму што, калі табе пагражае прэзыдэнт, што ты можаш зрабіць?»

На прэс-канфэрэнцыі 3 лютага Аляксандар Лукашэнка прапанаваў распачаць супраць Сяргея Данкверта крымінальную справу за перашкоды пастаўкам беларускіх харчоў.

«Ведаеце, рознага кшталту данкверты... Нам трэба вывучыць гэтае пытаньне, Ігар Анатолевіч [Шуневіч], і распачаць крымінальную справу, як некалі па Керымаву і Баўмгэртнэру. За нанясеньне ўрону дзяржаве. Распачаць крымінальную справу, і мы яго дастанем. Калі ён пабудзе ў СІЗА, ён будзе даваць сабе справаздачу, што ён робіць».

У Крамлі ў сваю чаргу выказалі неўразуменьне заявам пра крымінальны перасьлед Данкверта.

У той жа дзень было абвешчана, што Рассельгаснагляд з 6 лютага ўводзіць часовыя абмежаваньні на пастаўкі ялавічыны і ялавічных субпрадуктаў з усіх прадпрыемстваў Менскай вобласьці.

Глядзець камэнтары (3)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG