(Карэспандэнтка: ) “Скажыце, калі ласка, як вы рыхтуецеся да Вялікдня?”
(Спадарыня: ) “З энтузіязмам мы заўсёды сустракаем гэтае сьвята. Усё да яго самае лепшае, каб шмат страваў было на стале. Царкву трэба абавязкова наведаць. Як і належна нашаму грамадзяніну і верніку”.
(Спадарыня: ) “Сёньня будзем усё мыць, прыбіраць, як належна. Учора нельга было працаваць, а сёньня будзем усё рабіць”.
(Спадар: ) “Чысты чацвер! Сёньня трэба памыцца, прыбрацца трэба, пыл паганяць у кватэры. Каб кватэра была чысьценькая, быў парадак, і прымаць гасьцей”.
(Спадар: ) “Жонка зробіць кулічы, я пафарбую яйкі, прыгатуем падарункі і ў гэты дзень пойдзем сваіх хрэсьнікаў віншаваць. Сядзем з кумаўямі за стол, вып’ем чарку”.
(Спадар: ) “Я бы вам разгарнуў кайстру і паказаў, чаго тут я набыў: мясныя прадукты, курыцу, каўбасы, яйкі пафарбаваныя ў розныя колеры. Шампанскае ёсьць, запрашаю вас разам адзначыць такое вялікае сьвята”.
(Карэспандэнтка: ) “Скажыце, калі ласка, але людзі да Вялікдня рыхтуюцца — ня толькі з падарункамі і з застольлем? Кажуць, яшчэ трэба і духоўна падрыхтавацца да гэтага сьвята…”
(Спадар: ) “Абавязкова. Я схадзіў у царкву, памаліўся, пакаяўся, адмаліў свае грахі, якія былі ў жыцьці”.
(Спадар: ) “Самае галоўнае — зла ні на каго не трымаць, усім дараваць усё”.
(Спадарыня: ) “Я мяркую, што вера павінна быць. Празь веру зьвяртацца да царквы, да Бога адзінага, хто нас стварыў”.
(Карэспандэнтка: ) “А перадвелікодны пост вы трымаеце?”
(Спадарыня: ) “Я з-за стану свайго здароўя не магу строга трымаць посту, аднак імкнуся”.
(Спадарыня: ) “У жыцьці атрымліваецца ўсё роўна пост, таму што грошай мала зарабляем, заробкі маленькія, таму пасьцімся ў жыцьці”.
(Карэспандэнтка: ) “А што бы вы людзям пажадалі на Вялікдзень?”
(Спадарыня: ) “Быць добрымі да ўсіх. Гэта лепей, чым пасьціцца. Любіць адзін аднога”.
(Спадарыня: ) “Госпадзі, каб ува ўсіх было шчасьце і каб усе былі сытыя”.
(Спадарыня: ) “Мы жывем у цяжкі час. Я бы пажадала ўсім сьвету, дабра і здароўя”.
(Спадар: ) “Маліць Бога ня толькі на вялікія сьвяты, а штодня, каб у нашай Беларусі было цудоўна, спакойна, чыста, добразычліва”.
(Спадар: ) “У гэты дзень людзі радуюцца адзін адному, хрыстосяцца. Яно адзначаецца даўно — гэта радаснае і сьветлае сьвята”.
Гэтак пра падрыхтоўку да сьвята Вялікдня распавядалі жыхары Магілёва.
