Лінкі ўнівэрсальнага доступу

Навіны 28 чэрвеня 2000 г.


Любоў Лунёва, Менск

390 тысячаў рублёў штрафу – такі прысуд вынесены арганізатару несанкцыянаванага пікету супраць дзеяньняў Менскага гарадзкога выканкаму Ўладзімеру Раманоўскаму. Штраф памерам 20 мінімальных заробкаў паводле судовага рашэньня павінна выплаціць удзельніца пікету Галіна Ганчарык, а Людміла Бажок атрымала папярэджаньне. Справа Аляксея Радзівонава спыненая.

Напачатку паседжаньня судзьдзя Алена Тройніч зачытала прысуд намесьніку старшыні гарадзкой арганізацыі АГП Ўладзімеру Раманоўскаму, які абвінавачваўся ў арганізацыі несанкцыянаванага пікету. Вось што ён распавёў нашаму Радыё:

"У мяне склалася ўражаньне, што судзьдзя прымала рашэньне не паводле ўласнага перакананьня. Сёньня чалавек, які жыве ў нашым грамадзтве, ня можа не разумець, што ў нас ствараецца сыстэма, якая нас жа й зьнішчыць. Мы гэта ўжо праходзілі ў 30-я гады. Мне шкада нас усіх, калі мы ўдзельнічаем у пабудове такое сыстэмы", – паведаміў Уладзімер Раманоўскі.

Потым суд разгледзеў адміністрацыйную справу Аляксея Радзівонава. Гэты сталы чалавек выпадкова трапіў на пікет, бо, калі ішоў па вуліцы, заўважыў знаёмых і падыйшоў да іх. Ён ня ведаў, што пікет несанкцыянаваны. Паколькі гэта пацьвердзілі ўсе сьведкі, справу супраць Радзівонава суд спыніў.

У справе Галіны Ганчарык сьведка з боку міліцыі падпалкоўнік Андрэй Мухтараў даў такія тлумачэньні: "грамадзкі парадак пікетоўцы не парушалі. Яны парушылі толькі артыкул Адміністрацыйнага кодэксу. Паводзілі сябе прыстойна, таму мы іх і не затрымлівалі, пакуль іх пікет ня скончыўся".

Паколькі судзьдзя вызначыла пікет лічыць несанкцыянаваным, дык аштрафавала Галіну Ганчарык на 20 мінімальных заробкаў. Сябра Рады АГП Галіна Ганчарык так пракамэнтавала гэтае рашэньне:

"Мне далі штраф 20 мінімальных заробкаў, а пэнсія ў мяне 23 тысячы рублёў. Гэта дзьве мае пэнсіі. А калі ўлічыць, што я інвалід ІІІ групы, дык можна ўявіць, наколькі гэта цяжка для мяне. Я буду абскарджваць рашэньне суду ў вышэйшыя інстанцыі", – распавяла Галіна Ганчарык.

Апошняю была разгледжаная справа Людмілы Бажок. Судзьдзя ўлічыла, што яна часова беспрацоўная, мае на ўтрыманьні 14-гадовага сына, і вынесла папярэджаньне.

"Чыкін зьяўляецца сакратаром камуністычнае партыі. [Дзяржаўнымі чыноўнікамі] мусяць быць людзі, якія не зьяўляюцца сябрамі партыяў. Дэмакратаў адпраўляюць на "Сабачы" пляц, а камуністы – могуць амэрыканскую амбасаду пікетаваць", – паведаміла Людміла Бажок.

Уладзімер Раманоўскі паведаміў, што таксама будзе абскарджваць судовае рашэньне. У сваёй скарзе ён мае намер прасіць суд узяць зь Менскага гарадзкога выканкаму копію пісьмовага дазволу на пікетаваньне ля амэрыканскай амбасады, які атрымала ад гарадзкіх уладаў пракамуністычная партыя Баранкевіча.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG