Лідэры аб’яднанай дэмакратычнай апазыцыі лічаць, што іх нядаўні візыт
у шэраг эўрапейскіх сталіцаў быў даволі пасьпяховы. Паводле прадстаўнікоў
Каардынацыйнае рады, эўрапейскія структуры выказалі ім сваю падтрымку,
а таксама спадзяваньне, што ў наступным годзе ў Беларусі пачнуцца кардынальныя
дэмакратычныя пераўтварэньні.
Сёньня прадстаўнікі Каардынацыйнае рады дэмакратычных сілаў Вінцук Вячорка,
Андрэй Саньнікаў і Аляксей Кароль правялі прэсавую канфэрэнцыю, у часе
якой падвялі вынікі свайго візыту ў Эўропу.
Паводле словаў міжнароднага каардынатара “Хартыі-97” Андрэя Саньнікава,
графік сустрэчаў у Брусэлі, Парыжы, Страсбургу, Лёндане й Бэрліне быў надзвычай
насычаным. Яны сустрэліся з найвышэйшым прадстаўніком Эўразьвязу ў справе
замежнае палітыкі Гаўерам Салянам, былым амбасадарам ЗША ў Беларусі Дэніэлам
Спэкгардам, які цяпер працуе ў штаб-кватэры NATO, з чыноўнікамі францускага
МЗС, з дэлегацыяй Эўрапарлямэнту ў справах Беларусі (Ян Віерсма, Элізабэт
Шродтэр ды іншыя), з намесьнікам кіраўніка замежнапалітычнага ведамства
Вялікае Брытаніі Кэйтам Васам ды парлямэнтарамі. Таксама адбыліся сустрэчы
з намесьнікам міністра замежных справаў Нямеччыны Крыстафэрам Цопфэлем,
дакладчыкам Рады Эўропы ў справах Беларусі Вольфгангам Бэрэндтам ды іншымі
вядомымі эўрапейскімі палітыкамі.
Паводле лідэра Партыі БНФ Вінцука Вячоркі, у прадстаўнікоў розных эўрапейскіх
краінаў і структураў няма разыходжаньняў у поглядах на сытуацыю ў Беларусі.
Усе яны не прызнаюць вынікаў выбараў у г.зв. “палату”, і лічаць, што зьмена
кіраўніцтва Беларусі магчымая толькі ў выніку перамогі дэмакратычнага кандыдата
на прэзыдэнцкіх выбарах.
На думку лідэраў аб’яднанай апазыцыі, у дэпутаў г.зв. “палаты” амаль
няма шанцаў быць прызнанымі ў Эўропе й прадстаўляць Беларусь у міжнародных
структурах.
Абмяркоўвалася й пытаньне ўплыву Расеі на беларускую сытуацыю. Гаворыць
Вінцук Вячорка:
(Вячорка: ) “Мы зьвярталіся з просьбай да ўсіх нашых эўрапейскіх суразмоўцаў
скарыстаць іх уплыў для таго, каб у беларускім пытаньні Расея – што было
б найлепш для нас – прынамсі, захоўвала нэўтралітэт, калі паўстане пытаньне
аб прэзыдэнцкіх выбарах 2001 году. Праграма максымум – гэта выкарыстаньне
Эўропай і Злучанымі Штатамі ўсяго патэнцыялу ўплыву на Расею для таго,
каб яна ня ўмешвалася ў нашыя нутраныя справы, не ратавала Лукашэнку і
не навязвала нам альтэрнатыўнага “Лукашэнку”, але ў роўнай ступені – прамаскоўскага
кандыдата”.
Паведаміў спадар Вячорка.
На думку прадстаўнікоў Каардынацыйнае рады ўплыў на Расею ў Эўропы вялікі.
Паводле апазыцыянэраў, у часе сустрэчы Крыстафэр Цопфэль заявіў, што стратэгічнае
партнэрства Нямеччыны з Расеяй немагчымае пры падтрымцы ёю недэмакратычнае
ўлады ў Беларусі.
У сваю чаргу апазыцыянэры запэўнілі нямецкіх палітыкаў, што падтрымліваюць
ідэю правядзеньня газаводу з Расеі празь беларускую тэрыторыю ў Заходняю
Эўропу, бо ажыцьцяўленьне гэтага праекту — у нацыянальных інтарэсах Беларусі.
Лідэры Каардынацыйнае рады паведамілі, што адзінства беларускай апазыцыі
будзе захаванае, нягледзячы на спробы ўладаў і некаторых палітыкаў разбурыць
кааліцыю. Так, учора менскі гарадзкі камітэт “Народнае Грамады” выключыў
з шэрагаў партыі лідэра фракцыі “За адзінства” Аляксея Караля, які нібыта
неаднаразова парушыў партыйны статут.
Спадар Кароль назваў гэтае рашэньне незаконным, бо ён намесьнік старшыні
партыі, абраны на гэтую пасаду зьездам. І толькі зьезд можа яго выключыць
з партыі. Паводле словаў Аляксея Караля, ён і ягоныя паплечнікі маюць намер
у бліжэйшы час ініцыяваць скліканьне нечарговага зьезду “Народнае Грамады”.
Альгерд Невяроўскі, Менск
Самае папулярнае
1