Адказваючы на пытаньні журналістаў на борце самалёта Air Force One падчас палёту дамоў з Пэкіну, Дональд Трамп заявіў, што Вашынгтон і Пэкін хацелі б бачыць разьвязаньне праблемы вайны Расеі супраць Украіны.
Прэзыдэнт ЗША Дональд Трамп выказаў думку, што расейскі ўдар, які часткова разбурыў дзевяціпавярховы жылы дом у Кіеве, у выніку чаго загінулі 24 чалавекі, можа зьвесьці на нішто намаганьні спыніць вайну Расеі з Украінай.
Ракетны ўдар, які зьнішчыў увесь пад’езд у дзевяціпавярховым доме ў Дарніцкім раёне ўкраінскай сталіцы, быў часткай масаванага расейскага авіяўдару, які пачаўся 13 траўня, праз два дні пасьля заканчэньня спыненьня агню, дасягнутага пры пасярэдніцтве ЗША 9–11 траўня.
Адказваючы на пытаньні журналістаў на борце самалёта Air Force One па дарозе дадому з Пэкіну пасьля саміту з старшынём Кітайскай Народнай Рэспублікі Сі Цзіньпінам, Трамп заявіў, што Вашынгтон і Пэкін хацелі б бачыць вырашэньне вайны Расеі з Украінай.
«Да ўчорашняй ночы ўсё выглядала добра, але яны [ўкраінцы] атрымалі моцны ўдар мінулае начы. Так што гэта адбудзецца [канец вайны]. Але гэта прыкра», — сказаў Трамп, маючы на ўвазе расейскі ўдар.
Кіеў пасьля расейскай ракетнай атакі: разбурэньні і ратавальная апэрацыя. ФОТА
Расейскія войскі нанесьлі масаваны ўдар па Ўкраіне празь некалькі дзён пасьля таго, як прэзыдэнт Расеі Ўладзімір Пуцін заявіў на прэс-канфэрэнцыі 9 траўня, што, на яго думку, вайна «набліжаецца да канца».
Адначасова Пуцін ня выказаў гатоўнасьці пайсьці на кампрамісы, якія маглі б прывесьці да патэнцыйнага мірнага пагадненьня з Украінай, а яго прэс-сакратар Дзьмітрый Пяскоў 13 траўня паўтарыў тэрытарыяльныя прэтэнзіі Крамля, заявіўшы, што Масква лічыць, што Кіеў павінен «пакінуць тэрыторыю Данбасу, пакінуць тэрыторыю расейскіх рэгіёнаў» у якасьці перадумовы для мірных перамоваў.
7 траўня 2026 года памочнік расейскага кіраўніка Юрый Ушакоў заявіў, што Расея ня бачыць сэнсу ў новым раўндзе трохбаковых перамоваў з удзелам Масквы, Кіева і Вашынгтона, каб спыніць вайну, пакуль Украіна ня выведзе свае войскі з Данбасу.
Амэрыканскі Інстытут вывучэньня вайны ў справаздачы ад 14 траўня заявіў, што «перабольшаныя тэрытарыяльныя амбіцыі і агрэсіўныя тэрытарыяльныя патрабаваньні Расеі цалкам супярэчаць рэаліям на полі бою».
З моманту ўступленьня на пасаду ў студзені 2025 году Дональд Трамп заклікае да неадкладнага спыненьня вайны ва Ўкраіне. ЗША выступілі ў якасьці пасярэдніка ў сэрыі перамоваў, якія не прывялі да спыненьня агню. Расея зрабіла кантроль над усёй Данецкай вобласьцю Ўкраіны ўмовай пачатку дыялёгу, што непрымальна для Ўкраіны.
