Зяленскі: Расейскія войскі абстралялі дом у Кіеве ракетай Х-101, якая зьмяшчае заходнія кампанэнты

Расейскія войскі 14 траўня абстралялі дом у Кіеве, зруйнаваўшы цэлы пад’езд

Колькасьць загінулых у Кіеве ў выніку расейскага ўдару 14 траўня павялічылася да 12 чалавек, у тым ліку дваіх дзяцей. Пошукі працягваюцца.

14 траўня расейскія войскі абстралялі дом у Кіеве ракетай Х-101. Гэта сьведчыць, што Масква працягвае атрымліваць патрэбныя кампанэнты ў абыход заходніх санкцыяў.

Пра гэта заявіў прэзыдэнт Украіны Ўладзімір Зяленскі ў відэазвароце.

«Паводле папярэдніх зьвестак, дом у Кіеве быў паражаны ракетай Х-101. Яна вырабленая ў другім квартале гэтага году. А гэта азначае, што Расея ўсё яшчэ імпартуе кампанэнты для вытворчасьці ракет, неабходныя рэсурсы і абсталяваньне ў абыход глябальных санкцыяў. І гэта павінна быць рэальнай мэтай усіх нашых партнэраў — спыніць расейскія схемы абыходу санкцыяў», — заявіў кіраўнік украінскай дзяржавы.

Расейская стратэгічная крылатая ракета Х-101 крытычна залежыць ад замежных электронных кампанэнтаў, бо ўласная расейская прамысловасьць ня ў стане вырабляць высокатэхналягічную мікраэлектроніку, піша Ўкраінская служба Радыё Свабода.

Паводле зьвестак Службы бясьпекі Украіны (СБУ) і Галоўнага ўпраўленьня выведкі (ГУР) Міністэрства абароны Ўкраіны, адна такая ракета можа ўтрымліваць да 250 замежных дэталяў заходняй вытворчасьці. У прыватнасьці, у ракеце, якая ў ліпені 2024 году ўдарыла па кіеўскім шпіталі «Охматдит», было знойдзена 59 выразна ідэнтыфікаваных кампанэнтаў, вырабленых у ЗША, ЭЗ і іншых краінах.

Колькасьць загінулых у Кіеве ў выніку расейскага ўдару 14 траўня павялічылася да 12 чалавек, у іх ліку двое дзяцей, паведаміла Дзяржаўная служба надзвычайных сытуацыяў Украіны ўвечары 14 траўня. Колькасьць ахвяраў наўрад ці канчатковая, пошукі яшчэ працягваюцца.

Мэр Кіева Віталь Клічко паведаміў, што ў выніку нападу ў Кіеве параненыя 46 чалавек, у тым ліку дзіця. 20 зь іх у гарадзкіх шпіталях, дадаў мэр.

Кіеўскія ўлады вырашылі абвясьціць 15 траўня днём жалобы па ахвярах расейскага ўдару па сталіцы Ўкраіны 14 траўня.

Кіеў пасьля расейскай ракетнай атакі: разбурэньні і ратавальная апэрацыя. ФОТА

У дзевяціпавярховым доме ў Дарніцкім раёне Кіева, які быў часткова зруйнаваны расейскім ударам, разбурана 18 кватэраў. Дзяржаўная служба надзвычайных сытуацыяў раней паведамляла, што пасьля абвальваньня дому ў Дарніцкім раёне зьніклі бязь вестак ня менш за 20 чалавек. Паводле зьвестак Вайскова-паветраных сілаў Украіны, у ноч на 14 траўня расейскія войскі выкарысталі 56 ракет розных тыпаў і 675 ударных бесьпілётнікаў у масаванай атацы супраць Украіны, галоўнай цэльлю якой быў Кіеў.

ГЛЯДЗІЦЕ ТАКСАМА:

Ракетная атака Расеі па Ўкраіне: шмат ахвяр, у Кіеве пацярпеў найбуйнейшы дзіцячы шпіталь. ФОТА

ГЛЯДЗІЦЕ ТАКСАМА:

У Кіеве ад расейскага ўдару абрынуўся пад’езд жылога дому, шмат ахвяр. Дроны з Расеі ляцелі празь Беларусь