Радыё Свабода ідэнтыфікавала расейскіх вайскоўцаў, імаверна, датычных да забойстваў у Бучы

Your browser doesn’t support HTML5

Украінская служба Радыё Свабода здолела вызначыць расейскіх вайскоўцаў, якія, імаверна, спрычыніліся да расстрэлаў чатырох цывільных грамадзян і двух удзельнікаў мясцовай тэрытарыяльнай абароны ў Бучы.

Гэтых шасьцёх чалавек забілі 4–5 сакавіка 2022 году падчас расейскай акупацыі ў раёне Яблунскай вуліцы ў горадзе Бучы за 30 кілямэтраў на захад ад Кіева.

Радыё Свабода дэталёва дасьледавала абставіны расправы зь мясцовымі ўдзельнікамі тэрытарыяльнай абароны Андрэем Мацьвійчуком і Віталём Карпенкам, а таксама забойстваў чатырох цывільных жыхароў Бучы: Ігара Гарадзецкага, Дзьмітрыя Канавалава, Валерыя Кізілава і Ўладзіміра Рубайлы.

Да забойстваў гэтых бучанцаў, паводле расьсьледаваньня Радыё Свабода, могуць быць датычныя асобныя расейскія вайскоўцы, якія ў сакавіку 2022 году ўваходзілі ў склад 234-га дэсантна-штурмавога палку 76-й дывізіі паветрана-дэсантных войскаў РФ з Пскова:

  • выведнік-снайпэр выведнага ўзводу сяржант Арцём Дзяменцьеў,
  • начальнік выведнага ўзводу лейтэнант Арцём Тарэеў,
  • камандзір аддзяленьня 5-й роты сяржант Уладзімір Барзуноў,
  • камандзір 5-й роты капітан Яўгеній Плюсьнін.


Пскоўскія дэсантнікі — фігуранты расьсьледаваньня Радыё Свабода. Выява з камэры назіраньня ў Бучы. 4 сакавіка 2022 году

З фактамі і доказамі імавернай датычнасьці гэтых расейскіх вайскоўцаў да расстрэлаў можна азнаёміцца ў трэцяй частцы фільму-расьсьледаваньня пра масавыя забойствы ў Бучы карэспандэнта Радыё Свабода Дзьмітрыя Джулая. Фільм «Буча. Яблунская» можна паглядзець на ютуб-канале Радыё Свабода.

У гэтым расьсьледаваньні Радыё Свабода пахвілінна рэканструюе тры дні сакавіка 2022 году на Яблунскай вуліцы, калі адбываліся расстрэлы мірнага насельніцтва ў Бучы войскам Расейскай Фэдэрацыі.

Для стварэньня гэтага расьсьледаваньня аўтар праекту

  • сабраў дзясяткі гадзін з камэраў назіраньня ў Бучы;
  • атрымаў фота і відэа з тэлефонаў відавочцаў акупацыі гораду;
  • адшукаў дакумэнты і атрымаў сакрэтныя сьпісы расейскіх падразьдзелаў, якія акупавалі Бучу;
  • ідэнтыфікаваў некалькі соцень расейскіх вайскоўцаў, якія дзейнічалі ў Бучы, і дасьледаваў іх сацыяльныя сеткі;
  • дэталёва прасачыў за расейскімі вайскоўцамі з разнастайных камэраў назіраньня ў момант расстрэлаў цывільных і пакараньняў мясцовых самаабаронцаў.

ГЛЯДЗІЦЕ ТАКСАМА:

Беларускі паэт з Бучы Сяргей Прылуцкі пайшоў ваяваць за Ўкраіну

Журналісту Радыё Свабода таксама ўдалося асабіста паразмаўляць з адным зь фігурантаў расьсьледаваньня — сяржантам расейскай арміі Ўладзімірам Барзуновым — і атрымаць ад яго пацьверджаньне таго, што войска РФ забівала цывільных у Бучы.

Іншыя пскоўскія дэсантнікі, фігуранты расьсьледаваньня Арцём Дзяменцьеў, Валянцін Лагода, Арцём Тарэеў і Яўгеній Плюсьнін, не адказалі на запыт Радыё Свабода адносна камэнтароў.

Таксама ў фільме ўпершыню паказалі невядомыя кадры з камэраў назіраньня, на якіх зафіксаваныя расстрэлы цывільных, учыненыя расейскім войскам, і сьведчаньні родных загінулых ды відавочцаў забойстваў на Яблунскай вуліцы.

ГЛЯДЗІЦЕ ТАКСАМА:

Украіна заяўляе пра 150 тысяч магчымых ваенных злачынстваў Расеі. Вось 5 найгоршых

«Буча. Яблунская» — трэцяя частка расьсьледаваньня Радыё Свабода пра масавыя забойствы ў Бучы. Папярэдняя частка фільму «Буча. Забойства самаабаронцы Пабягая» ў траўні 2025 году атрымала ў ЗША залатую ўзнагароду тэлекінапрэміі New York Festivals 2025 у намінацыі «Правы чалавека». А першая частка пра забойства палкоўніка СБУ Аляксея Целіжэнкі стала падставай для ўкраінскіх ахоўных органаў абвясьціць падазрэньне расейскаму афіцэру, які быў адным зь фігурантаў расьсьледаваньня.

Паводле інфармацыі архіўнага аддзелу Бучанскай гарадзкой рады, за пэрыяд расейскай акупацыі сярод жыхароў Бучы і ваколіц загінулі 554 цывільныя.

  • 43 целы застаюцца неапазнанымі,
  • 38 цывільных бучанцаў лічацца зьніклымі бязь вестак,
  • прынамсі 33 мужчыны дагэтуль у палоне,
  • 1 захоплены цывільны загінуў у расейскай няволі.

Расея адмаўляе датычнасьць сваіх войскаў да масавых забойстваў цывільных у Бучы. Міністэрства абароны РФ заявіла, што за час знаходжаньня расейскіх войскаў у гэтым горадзе «ніводзін мясцовы жыхар не пацярпеў ад якіх-кольвек гвалтоўных дзеяньняў», а прэзыдэнт Расеі Ўладзімер Пуцін назваў масавыя расстрэлы ў Бучы «фэйкам» і «правакацыяй».

ГЛЯДЗІЦЕ ТАКСАМА:

Паліцыя Ўкраіны раскрыла забойствы 72 мірных жыхароў Бучы ў 2022 годзе