Чакецца, што цягам 20 жніўня Беларусь і М’янма плянуюць падпісаць шэраг дакумэнтаў. Мін Аўнг Глайнг таксама прыме ўдзел у цырымоніі адкрыцьця пасольства Мʼянмы ў Менску.
Турчын: «Мы — аднадумцы»
Прэм’ер-міністар Беларусі Аляксандар Турчын заявіў, што Беларусь і М’янма зьяўляюцца «найбліжэйшымі партнэрамі і аднадумцамі», нягледзячы на вялікую геаграфічную адлегласьць.
«Палітычная воля прэзыдэнта Беларусі Аляксандар Лукашэнкі і прэзыдэнта М’янмы Мін Аўн Глайнга задае высокую плянку ўзаемадзеяньня», — сказаў Турчын падчас адкрыцьця Беларуска-м’янмскага форуму.
Кіраўнік М’янмы Мін Аўнг Глайнг слухае выступ беларускага прэм'ера на Беларуска-м’янмскім форуме. 20 жніўня
Турчын выказаў думку, што эканомікі дзьвюх краіны «не канкуруюць, а ўзаемна дапаўняюць адна адну». Прэм’ер Беларусі прапанаваў сканцэнтравацца на пераходзе ад простых тавараабменных апэрацый да глыбокай прамысловай каапэрацыі ў наступных сфэрах:
- лёгкая прамысловасьць,
- аграпрамысловы комплекс,
- ахова здароўя і фармацэўтыка,
- высокія тэхналёгіі, навука і падрыхтоўка кадраў,
- юрыдычная база для інвэстыцый і стварэньне фінансава-лягістычнай інфраструктуры.
«Мы гатовыя да рэалізацыі праектаў, у аснове якіх — лякалізацыя вытворчасьці ў М’янме шырокай лінейкі запатрабаваных тавараў. Беларусь прапануе М’янме ня проста набываць гатовую тэхніку, а з апорай на беларускія тэхналёгіі супольна працаваць над стварэньнем дабаўленай вартасьці ўнутры вашай краіны», — заявіў Аляксандар Турчын.
ГЛЯДЗІЦЕ ТАКСАМА:
Беларусам далі «бязьвіз» у М’янму, але абавязалі рэгістраваць там свае мабільныя тэлефоныУ М’янме кіруе вайсковая хунта
Паварот замежнай палітыкі афіцыйнага Менску ў бок Глябальнага Поўдня і Паўднёва-ўсходняй Азіі адбыўся з-за канфлікту Беларусі з Захадам.
У М’янме Лукашэнка выказваў захапленьне гэтай краінай і рэжымам, які там кіруе. А між тым М’янма — адна з самых праблемных, бедных і ізаляваных краінаў сьвету. Там кіруе вайсковая хунта. У краіне ідзе грамадзянская вайна.
Пракурор Міжнароднага крымінальнага суду запрасіў ордэр на арышт кіраўніка вайсковай хунты Мін Аўнг Глайнга, які стаў прэзыдэнтам.
У 2025 годзе Мін Аўнг Глайнг двойчы наведваў Беларусь. Галоўным кампанэнтам абодвух візытаў была вайскова-тэхнічная супраца — на сустрэчах найперш абмяркоўвалі пытаньні паставак, мадэрнізацыі тэхнікі, а таксама пляны па паглыбленьні абароннага супрацоўніцтва.
Дыпляматычныя адносіны паміж Беларусьсю і М’янмай былі ўстаноўленыя ў 1999 годзе. Ганаровае консульства Беларусі ў Янгоне адкрытае ў 2011 годзе. За апошнія дзесяць гадоў актывізаваліся афіцыйныя візыты, заключэньне пагадненьняў і арганізацыя сумесных абаронных праграм.
Вайсковае супрацоўніцтва каардынуецца праз сумесную камісію, у рамках якой абмяркоўваюцца пытаньні вытворчасьці, рамонту, трансфэру тэхналёгій і навучаньня.
Праваабарончая арганізацыя Justice For Myanmar заклікае заходнія юрысдыкцыі каардынаваць адсочваньне і надгляд падазроных грузаў на судах і самалётах, якія курсіруюць паміж Беларусьсю і Мʼянмай, у прыватнасьці праз транзытныя краіны, а таксама ўзмацніць мытны кантроль у транзытных вузлах, праз якія могуць накіроўвацца грузы зь Беларусі ў Мʼянму.
Арганізацыя таксама заклікае пашырыць санкцыі ў адказ на беларускае саўдзел у Мʼянме. У прыватнасьці, БДУІР, БДТУ і БДУ і іх кіраўніцтва павінны быць падвергнутыя санкцыям і шырэйшаму акадэмічнаму байкоту з прычыны іх сувязяў з мʼянманскай хунтай.