У Каленкавічах на Гомельшчыне выбарнікаў стымулююць галасаваць датэрмінова — за голас прапануюць бясплатна квіткі ў кіно, на батут і ў дзіцячы пакой.
У гарадзкім кінатэатры «Знамя», дзе разьмясціўся ўчастак для галасаваньня № 7, парталу Tut.by пацьвердзілі, што можна паўдзельнічаць у такой акцыі.
«Так, прыходзьце, галасуйце і атрымлівайце білет. Адзін голас — адно запрашэньне. Можаце адразу зь дзеткамі прыходзіць», — запрасілі ў касе кінатэатру.
ГЛЯДЗІЦЕ ТАКСАМА: ЦВК: Яўка ў першы дзень датэрміновага галасаваньня склала 4,98%. Гэта больш, чым на ранейшых выбарахСтаршыня Калінкавіцкай раённай камісіі ў выбарах прэзыдэнта Алена Дзяргач запэўніла, што пра такую ініцыятыву на ўчастку ёй нічога не вядома, але выказала здагадку: «Можа быць, і ў асноўны дзень выбараў будзе такая акцыя, адкуль вы ведаеце?»
У першы дзень датэрміновых выбараў, паводле зьвестак Цэнтарвыбаркаму, на Гомельшчыне рэкордны працэнт яўкі ў параўнаньні зь іншымі рэгіёнамі — 4 жніўня прагаласавалі 7,55% выбарнікаў.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.