Кіраўнікі Беларусі і Расеі Аляксандар Лукашэнка і Ўладзімір Пуцін правялі 19 чэрвеня тэлефонную размову. З чыёй ініцыятывы яна адбылася, ня пішуць ані беларускі, ані расейскі бакі.
Прэс-служба Крамлю сьцісла апісвае тэмы размовы: парад Перамогі ў Маскве 24 ліпеня, пагадненьне аб прызнаньні візаў і пандэмія каранавірусу.
Прэс-сакратарка Лукашэнкі Натальля Эйсмант расказала БелТА, што:
- размоваў пра «газпрамаўскі банк» не было, тэму не абмяркоўвалі (маецца на ўвазе, пэўна, крымінальная справа супраць работнікаў «Белгазпрамбанку» і яго былога кіраўніка, патэнцыйнага кандыдата ў прэзыдэнты Віктара Бабарыкі);
- Пуцін расказаў Лукашэнку пра новыя японскія лекі, нібыта эфэктыўныя супраць каранавірусу, і Лукашэнка сказаў, што гэтыя лекі купяць і будуць выкарыстоўваць (пра якія лекі ішлося, невядома: даказанай эфэктыўнасьці сродкаў супраць COVID-19 няма, ёсьць толькі экспэрымэнтальныя прэпараты);
- Пуцін запрасіў Лукашэнку на парад у Маскве, Лукашэнка пагадзіўся, сказаў, што будзе там з сынамі (ці ўсімі трыма, не ўдакладняецца);
- Пуцін і Лукашэнка абмеркавалі сытуацыю з эканомікай, дамовіліся сустрэцца і абмеркаваць «пытаньні, якія сёньня стаяць на парадку дня», «працягнуць размову ў Маскве».