Кіраўнік замежнапалітычнага ведамства ЗША сказаў гэта на энэргетычнай канфэрэнцыі ў Х’юстане.
Дзяржаўны сакратар Майк Пампэо заклікаў амэрыканскіх вытворцаў нафты і газу супрацоўнічаць з адміністрацыяй Дональда Трампа для прасоўваньня нацыянальных інтарэсаў ЗША па усім сьвеце, асабліва ў Азіі і Эўропе. Пампэо заявіў пра гэта, выступаючы на штогадовай энэргетычнай канфэрэнцыі CERAWeek у Х’юстане, штат Тэхас.
Зьвяртаючыся да кіраўнікоў найбуйнейшых энэргетычных і нафтагазавых кампаніяў, Пампэо адзначыў, што знойдзеныя на тэрыторыі ЗША запасы лупняковых нафты і газу дазваляюць Вашынгтону ўмацаваць свае замежнапалітычныя пазыцыі.
«Мы павінны закасаць рукавы і канкураваць (на ўсясьветным рынку) — спрыяючы інвэстыцыям, матывуючы партнэраў купляць у нас і караючы „дрэнных гульцоў“», — заявіў дзяржаўны сакратар, маючы на ўвазе ў першую чаргу Расею, Іран і Вэнэсуэлу.
Паводле Пампэо, ажыўленьне ў амэрыканскай нафтагазавай галіне дало ЗША магчымасьць задаволіць попыт на крыніцы энэргіі, які некалі забясьпечвалі геапалітычныя супернікі краіны.
ГЛЯДЗІЦЕ ТАКСАМА: Эўрапарлямэнт перастаў лічыць Расею стратэгічным партнэрам«Мы ня хочам, каб нашы эўрапейскія саюзьнікі “падселі” на расейскі газ праз праект «Паўночны паток — 2», гэтаксама як і мы самі не хацелі б залежаць ад паставак нафты з Вэнэсуэлы», — сказаў Пампэо пра будаўніцтва новага газаправоду па дне Балтыйскага мора з Расеі ў Нямеччыну.
Акрамя таго, дзяржаўны сакратар назваў расейскае ўварваньне ва Ўкраіну спробай Крамля атрымаць доступ да нафтагазавай галіны суседняй дзяржавы.