Эўрапейскі парлямэнт выказаўся 12 сьнежня за спыненьне будаўніцтва «Паўночнага патоку – 2», які дэпутаты лічаць «палітычным праектам».
Рэзалюцыю падтрымалі 433 эўрапейскія парлямэнтары, 105 выказаліся супраць, 30 устрымаліся.
У Эўрапарлямэнце заявілі, што ключавую ролю ў эўрапейскай сетцы энэргазабесьпячэньня выконвае Ўкраіна, а «Паўночны паток – 2» уяўляе пагрозу эўрапейскай энэргетычнай бясьпецы, гаворыцца ў дакумэнце.
Палата прадстаўнікоў Кангрэсу ЗША 2 сьнежня ўхваліла рэзалюцыю, у якой выступіла за ўвядзеньне санкцыяў супраць «Паўночнага патоку – 2» і заклікала эўрапейскія краіны адмовіцца ад удзелу ў праекце. Кангрэс цяпер разглядае каля дзесяці заканадаўчых ініцыятываў, накіраваных супраць энэргетычнага сэктару Расеі і ейных экспартных магчымасьцяў, каб скараціць залежнасьць Эўропы ад расейскай нафты і газу.
У Вашынгтоне лічаць, што дывэрсыфікацыя крыніц энэргіі зьяўляецца ключом да захаваньня энэргетычнай незалежнасьці Эўропы.
«Паўночны паток – 2» павінен прайсці праз Балтыйскае мора ад узьбярэжжа Расеі да Нямеччыны. Увод у дзеяньне дзьвюх нітак трубаправоду агульнай магутнасцю 55 млрд м³ газу за год прызначаны на канец 2019-га.
Кошт будаўніцтва «Паўночнага патоку – 2» ацэньваецца ў 9,5 мільярда эўра.
Будаўніцтвам газаправоду займаецца Nord Stream 2 AG, якая належыць расейскаму «Газпрому». Заходнімі партнэрамі «Газпрому» зьяўляюцца нямецкія кампаніі Uniper і Wintershall, брытанска-галяндзкая група Royal Dutch Shell, француская Engie і аўстрыйская OMV.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў