Лінкі ўнівэрсальнага доступу

Бязьвізавым уездам у краіны Эўразьвязу скарысталіся амаль 13 тысяч украінцаў


На ўкраінска-польскай мяжы

За тыдзень ад моманту дзеяньня бязьвізавага рэжыму паміж Эўрапейскім зьвязам і Ўкраінай магчымасьцю перасячэньня мяжы скарысталіся больш за 365 тысяч украінцаў. Як паведаміла прэсавая служба Дзяржаўнай памежнай службы Ўкраіны, блізу 74 тысяч грамадзянаў падчас падарожжа выкарыстоўвалі новы від дакумэнту — біямэтрычныя пашпарты:

«12 875 чалавек скарысталіся менавіта перавагамі бязьвізавага рэжыму і перасякалі мяжу, маючы толькі біямэтрычны пашпарт», — гаворыцца ў паведамленьні ведамства.

Там удакладнілі, што траціна ад агульнай колькасьці скарысталіся авіяцыйным транспартам, астатнія — чыгуначным і аўтамабільным.
У паведамленьні Дзяржаўнай памежнай службы таксама гаворыцца, што ад пачатку ўвядзеньня «бязьвізу» у перасячэньні мяжы адмоўлена толькі 17 грамадзянам Украіны.

11 чэрвеня набыло моц рашэньне Рады Эўрапейскага Зьвязу, згодна зь якім грамадзяне Ўкраіны, якія маюць біямэтрычныя пашпарты, могуць наведваць краіны Эўразьвязу і Шэнгенскай зоны бязь візы. Выключэньнем застаюцца толькі Вялікая Брытанія і Ірляндыя.

Бязьвізавы рэжым паміж Эўразьвязам і Ўкраінай дазваляе ўкраінцам свабодна знаходзіцца і перамяшчацца па тэрыторыі Эўразьвязу на працягу 90 дзён за пэрыяд ня больш чым 180 дзён. У той жа час бязьвізавы рэжым не датычыць паездак, якія зьдзяйсьняюцца з камэрцыйнымі мэтамі альбо з працоўнымі. Для гэтага неабходна атрымаць адпаведную візу. Таксама віза спатрэбіцца для знаходжаньня на тэрыторыі Эўразьвязу на працягу больш чым 90 дзён запар.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG