11 чэрвеня набыло моц рашэньне Рады Эўрапейскага Зьвязу, згодна зь якім грамадзяне Ўкраіны, якія маюць біямэтрычныя пашпарты, могуць наведваць краіны Эўразьвязу і Шэнгенскай зоны бязь візы. Выключэньнем застаюцца толькі Вялікая Брытанія і Ірляндыя.
Бязьвізавы рэжым паміж Эўразьвязам і Ўкраінай дазволіць украінцам свабодна знаходзіцца і перамяшчацца па тэрыторыі Эўразьвязу на працягу 90 дзён за пэрыяд ня больш чым 180 дзён. У той жа час бязьвізавы рэжым не датычыць паездак, якія зьдзяйсьняюцца з камэрцыйнымі мэтамі альбо з працоўнымі. Для гэтага неабходна атрымаць адпаведную візу. Таксама віза спатрэбіцца для знаходжаньня на тэрыторыі Эўразьвязу на працягу больш чым 90 дзён запар.
Для перасячэньня мяжы з Эўразьвязам бязь візы грамадзянам Украіны неабходна мець пры сабе біямэтрычны пашпарт, неабходную на тэрмін паездкі суму грошай, дакумэнты, якія пацьвярджаюць мэту паездкі і месца пражываньня на тэрыторыі Эўразьвязу, мэдыцынскую страхоўку і страхоўку на аўтамабіль, калі паездка адбываецца на ўласным аўто.
Першыя паведамленьні аб бязьвізавым перамяшчэньні грамадзян Украіны празь мяжу з Эўразьвязам пачалі паступаць уначы.
