Лінкі ўнівэрсальнага доступу

Статкевіч пацьвердзіў: «Марш абураных беларусаў» адбудзецца, нягледзячы на затрыманьні


Мікола Статкевіч на акцыі пратэсту, архіўнае фота

21 кастрычніка а 14 гадзіне на Кастрычніцкай плошчы сталіцы мае адбыцца «Марш абураных беларусаў 2.0». Гэтую інфармацыя Свабодзе пацьвердзіў напярэдадні Мікола Статкевіч.

Тыдзень таму Мікола Статкевіч праінфармаваў Менгарвыканкам аб правядзеньні акцыі пратэсту — накіраваў паведамленьне па электроннай пошце і зарэгістраваў на сайце Менгарвыканкаму.

Ініцыятар «Маршу» — Беларускі нацыянальны кангрэс. Асноўныя патрабаваньні ўдзельнікаў акцыі — адмена дэкрэту № 3, павышэньне заробкаў і пэнсій. Таксама будзе ўзьнята праблема дзедаўшчыны, беззаконьня і бясчынства ў беларускім войску.

У пятніцу, 20 кастрычніка пры перадачы мэгафона затрымалі арганізатараў акцыі, пратрымалі паўтары гадзіны ў пастарунку, мэгафон забралі, паведаміў Свабодзе Статкевіч.

Напярэдадні акцыі ўлады прэвэнтыўна затрымліваюць актывістаў.

11 кастрычніка ўвечары каля крамы быў затрыманы і зьмешчаны ў ізалятар часовага ўтрыманьня адзін з арганізатараў Маршу, сустаршыня БХД Павал Севярынец. 2 кастрычніка яго асудзілі на 15 сутак, але з суду на Акрэсьціна не забралі, бо тады вызваліцца ён павінен быў бы 17 кастрычніка. Забралі толькі праз 9 дзён, так што на свабоду Севярынец выйдзе толькі 26 кастрычніка.

Таксама 11 кастрычніка на 15 сутак пасадзілі яшчэ аднаго з арганізатараў другога Маршу абураных беларусаў, актывіста «Эўрапейскай Беларусі» Яўгена Афнагеля.

13 кастрычніка пасадзілі на 10 сутак Максіма Вінярскага — за перапост у інтэрнэце артыкула, які суд палічыў заклікам да несанкцыянаванай акцыі пратэсту.

На першы «Марш абураных беларусаў» 17 лютага Беларускі нацыянальны кангрэс вывеў на вуліцы сталіцы каля 3000 чалавек.

***

Самыя галоўныя і цікавыя навіны можна атрымліваць адразу ж, падпісаўшыся на Тэлеграм-канал Радыё Свабода.

Ваша меркаваньне

Паказаць камэнтары

XS
SM
MD
LG