Міністар унутраных справаў Беларусі Ігар Шуневіч заявіў 25 кастрычніка, што праверка па справе зьнікненьня зь Беларусі ўкраінца Паўла Грыба, які зьнік зь Беларусі 28 жніўня і «знайшоўся» ў верасьні ў расейскай турме, яшчэ не завершаная, перадае БелаПАН.
«Праверка ня скончаная, — казаў Ігар Шуневіч. — Выяўляюцца ўсе акалічнасьці яго знаходжаньня на тэрыторыі [Беларусі] і таго, як ён выбыў зь яе. Таму рабіць выснову пра тое, што ён быў нейкім іншым, у тым ліку незаконным, спосабам перамешчаны, яшчэ рана. Мы гэта ўсё высьветлім і прэсе ў першую чаргу пра гэта абʼявім».
***
Расейскія сьледчыя сьцьвярджаюць, што Грыб ня быў выкрадзены з тэрыторыі Беларусі, а быў затрыманы ў мястэчку Ярцава ў Смаленскай вобласьці. Таксама, паводле сьледчых, Грыба абвясьцілі ў міжнародны вышук праз Інтэрпол яшчэ 12 жніўня. Чаму ён тады ня быў затрыманы на мяжы, калі 24 жніўня паехаў у Гомель, ні расейскі, ні беларускі бок не паведамляюць. Таксама як не паведамляецца, чаму Грыб нібыта паехаў у Расею.
Паўла ў Расеі падазраюць у падрыхтоўцы тэракту на лінейцы ў школе ў Сочы «з мэтай дыстабілізацыі органаў улады і ўзьдзеяньня на прыняцьце імі рашэньняў аб статусе асобных абласьцей Расейскай Фэдэрацыі».
Яго пакінулі пад арыштам да 4 студзеня, хоць бацькі і адвакат затрыманага прасілі перавесьці яго хаця б пад хатні арышт – яму, інваліду зь дзяцінства, патрэбна пастаянная інтэнсіўная тэрапія. Але расейскія праваахоўнікі лічаць, што ў Грыба «няма цяжкіх захворваньняў, якія перашкаджалі бы ўтрымліваць яго пад вартай». Украінскіх лекараў да яго не пусьцілі, таксама не дазволілі перадаць лекі.
Тым часам Украіна так і не атрымала тлумачэньняў ад афіцыйнага Менску наконт выкраданьня Грыба. Больш за месяц таму МЗС Беларусі заяўляў, што «вывучае сытуацыю». Украінцам афіцыйна рэкамэндавалі адмовіцца ад паездак у Расею празь Беларусь.
