Суд Цэнтральнага раёну Менску вынес пастанову аб пакараньні 10-суткавым адміністрацыйным арыштам каардынатара Беларускай хрысьціянскай дэмакратыі ў Менскай вобласьці Паўла Пракаповіча. Пра гэта паведамляе Праваабарончы цэнтар «Вясна».
І хоць працэс прайшоў яшчэ 1 жніўня, пра яго стала вядома толькі цяпер: сам актывіст у гэты час быў у ад’езьдзе і суд адбыўся ў ягоную адсутнасьць.
Пракаповіч абвінавачаны ва ўдзеле ў акцыі пратэсту 7 ліпеня ў Менску. У той дзень паўтара дзясятка актывістаў выйшлі на Кастрычніцкую плошчу на акцыю супраць сумесных з Расеяй вучэньняў «Захад-2017», а таксама ў падтрымку беларусаў, якія пацярпелі з палітычных матываў.
Судзьдзя Цэнтральнага раёну Іван Касьцян вынес пастанову аб пакараньні арыштам на 10 сутак паводле артыкулу 23.34 КаАП (удзел у несанкцыянаваным масавым мерапрыемстве).
Павал Пракаповіч мяркуе, што на суткі яго зараз забіраць ня будуць, гэтаксама як і іншых актывістаў — Леаніда Кулакова і Вольгу Мікалайчык, якім нядаўна суды таксама вынесьлі арышт. На ягоную думку, улады «прыберагуць пакараньне» да таго часу, калі апанэнтаў запатрабуецца тэрмінова ізаляваць.
