Лінкі ўнівэрсальнага доступу

МВФ: Для Беларусі самы час правесьці рэформу дзяржаўных прадпрыемстваў


Трактары МТЗ на парадзе. Ілюстрацыйнае фота
Трактары МТЗ на парадзе. Ілюстрацыйнае фота

Міжнародны валютны фонд завяршыў чарговыя кансультацыі зь беларускімі ўладамі. Гаворкі пра новы крэдыт не было — беларускія ўлады ўжо і ня просяць крэдыт, але не таму, што ня хочуць. Але МВФ дае парады Беларусі аб тым, што рабіць з эканомікай.

У МВФ адзначаюць, што беларуская эканоміка аднавілася пасьля двух гадоў рэцэсіі ў выніку пэўных захадаў у эканамічнай палітыцы, а таксам праз больш спрыяльныя вонкавыя ўмовы і рост унутранага попыту. Адзначаюць і рост валавога ўнутранага прадукту пасьля двух гадоў падзеньня, і запаволеньне інфляцыі да рэкордна нізкіх тэмпаў.

«Афіцыйныя органы трымаюць пад кантролем сальда дзяржаўнага бюджэту ў вузкім вызначэньні, аднак квазіфіскальная дзейнасьць у адчувальных маштабах працягвае аказваць падвышальны ціск на запазычанасьць», — адзначаюць у МВФ, згадваючы «забалянсавыя» апэрацыі з сэктарам дзяржаўнага кіраваньня, будаўніцтвам АЭС і іншым. Праз гэта бюджэт мае сумарны дэфіцыт у 3% ВУП.

Беларускія ўлады плянуюць затрымаць стасунак дзяржаўнай запазычанасьці да ВУП у межах 44,5% у 2018 годзе, але МВФ прагназуе рост дзяржаўнай запазычанасьці (разам зь недзяржаўнай, «гарантаванай дзяржаваю») да 55% ВУП.

Рэструктурызацыя дзяржаўнага сэктару ў Беларусі ідзе «паступова» і «на пілётнай аснове», мяркуе МВФ, і гэта перашкаджае агульнаму росту прадукцыйнасьці працы, спрыяе захаваньню фактараў уразьлівасьці эканомікі на адносна высокіх узроўнях. Таму, як прызналі выканаўчыя дырэктары МВФ, Беларусі трэба «скарыстаць момант» для паскораных і паглыбленых рэформаў у рэальным сэктары, у тым ліку ў сэктары дзяржаўных прадпрыемстваў, а таксама ў прыватным сэктары, якому трэба прыбраць перашкоды на таварным рынку і рынку працы.

Іначай прагноз сярэднетэрміновай пэрспэктывы для Беларусі такі: празь неспрыяльную дэмаграфічную дынаміку, слабыя ўмовы крэдытаваньня і адставаньне ў канкурэнтаздольнасьці эканомікі, збудаванай вакол дзяржаўнага сэктару, тэмпы эканамічнага росту абмяжуюцца 2%, а інфляцыя застанецца вышэйшай за суседнія краіны — дасягне 5%.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG