Беларуская тэлевізія са сьпазьненем уключыла трансьляцыю матчу паміж зборнымі Беларусі і Фінляндыі.
Як паведаміла выданьне by.tribuna.com, перад пачаткам матчу традыцыйна мусілі прагучаць гімны краін. Але заўзятары, якія прысутнічалі на стадыёне, абсьвісталі беларускі гімн. Запіс, які гэта пацьвярджае, апублікавала жонка паўабаронцы зборнай Беларусі Яўгенія Яблонскага Крысьціна. Яна раней працавала на дзяржаўнай тэлевізіі і знаходзілася на трыбуне для журналістаў у шаліку зь дзяржаўнай сымболікай.
Выданьне нагадала, што першапачаткова Фінляндыя не хацела прымаць зборную Беларусі праз падтрымку ўладамі краіны расейскай агрэсіі супраць Украіны. У выніку на 36-тысячны Алімпійскі стадыён прадалі толькі 6,5 тысяч квіткоў. Перад гэтым фінская фэдэрацыя заявіла, што ўсе грошы за квіткі пералічаць арганізацыі «Украінцы ў Фінляндыі».
На разьмінку гаспадары матча выйшлі ў футболках з надпісам «Мы выступаем за мір».
Апроч украінскіх сьцягоў фінскія заўзятары разгарнулі вялікі банэр, на якім палярная сава палявала на прусака. На ім было напісана «Твой дзень прыйдзе».
У другім тайме за брамамі беларускай зборнай фанаты вывесілі бел-чырвона-белы сьцяг. І калі ён трапляў у кадар, сьцьвярджае выданьне, дзяржаўная тэлевізія закрывала яго загадзя падрыхтаваным кадрам трыбун.
Матч завяршыўся без забітых галоў. Пасьля двух гульняў зборная Беларусі займае трэцяе месца ў першай групе Лігі С.
Што папярэднічала і чаму гэта важна
Фінская футбольная асацыяцыя хацела перанесьці сустрэчу ў Лізе нацый супраць нацыянальнай зборнай Беларусі на нэўтральную тэрыторыю. Але потым вырашылі праводзіць яго ў Хельсінкі — сталіцы краіны.
Фінляндыя была й сярод дзяржаў, якія байкатавалі цырымонію адкрыцьця Паралімпійскіх гульняў 2026 году ў Італіі. Шэраг краінаў учыніў дэмарш, бо расейцам і беларусам дазволілі выступаць пад дзяржаўнымі сьцягамі.
Фінляндыя падтрымлівае Ўкраіну ў яе абарончай вайне супраць Расеі.
Футбольная зборная Беларусі, у адрозьненьне ад расейскай каманды, не адлучаная ад міжнародных спаборніцтваў. Аднак ёй не дазваляюць гуляць хатнія паядынкі ў Беларусі, таму яны праходзяць у трэцяй краіне. Зазвычай у Вугоршчыне.
Форум