Фінская футбольная асацыяцыя прыняла рашэньне перанесьці сустрэчу Лігі нацый супраць нацыянальнай зборнай Беларусі на нэўтральную тэрыторыю.
Гульня адбудзецца 29 верасьня. Новае месца вызначаць пазьней.
«Міністэрства асьветы, культуры і спорту і Міністэрства замежных спраў не рэкамэндавалі ладзіць матч у Фінляндыі. Хоць гэта і не забарона, мы лічым важным прытрымлівацца замежнапалітычнай лініі Фінляндыі. Цяпер мы пачынаем падрыхтоўку да арганізацыі сустрэчы на нэўтральным полі.
Мы таксама заявілі, што падзеі ва ўсясьветнай палітыцы ў апошнія гады і месяцы разьвіваюцца імкліва і непрадказальна. Калі адбудуцца істотныя зьмены ў гэтым пытаньні, мы гатовыя хутка адрэагаваць», — паведаміў старшыня Фінскай футбольнай асацыяцыі Ары Лахці.
Фінская асацыяцыя ўжо шукае месца ў іншай краіне, каб правесьці там сустрэчу.
Фінляндыя была й сярод дзяржаў, якія байкатавалі цырымонію адкрыцьця Паралімпійскіх гульняў 2026 году ў Італіі. Шэраг краінаў учыніў дэмарш, бо расейцам і беларусам дазволілі выступаць пад дзяржаўнымі сьцягамі.
Фінляндыя падтрымлівае Ўкраіну ў яе абарончай вайне супраць Расеі.
Футбольная зборная Беларусі, у адрозьненьне ад расейскай каманды, не адлучаная ад міжнародных спаборніцтваў. Аднак ёй не дазваляюць гуляць хатнія паядынкі ў Беларусі, таму яны праходзяць у трэцяй краіне. Зазвычай у Вугоршчыне.
Форум