«Росту гэтай крымінальнай статыстыкі шмат у чым садзейнічае масавае ўкараненьне кампутарных сыстэм і безнаяўных плацяжоў у штодзённае жыцьцё», — працытавала Ўладзіслава Любаскіна дзяржаўнае агенцтва «Минск—новости».
Паводле яго, барацьбу з такімі злачынствамі ўскладняе іх транспамежны характар.
«Як правіла, за атакамі стаяць добра арганізаваныя сындыкаты, чые кол-цэнтры тэхнічна абсталяваны за мяжой. Туды ж, за ежы краіны, імгненна выводзяцца ўсе скрадзеныя капіталы, што істотна ўскладняе кампэнсацыю матэрыяльнай шкоды пацярпелым», — патлумачыў ён.
Уладзіслаў Любаскін дадаў, што для больш эфэктыўнага супрацьдзеяньня кібэрзлачыннасьці ў Менску рэалізуюць «комплекс прэвэнтыўных і тактычных захадаў па рацыянальным разьмеркаваньні сіл і сродкаў».
«У сталіцы пасьпяхова функцыянуе профільнае спэцыялізаванае ўпраўленьне, а ва ўсіх раённых аддзелах выдзеленыя канкрэтныя супрацоўнікі, якія забясьпечваюць расьсьледаваньне гэтай катэгорыі спраў. Усе яны рэгулярна праходзяць стажыроўкі і павышаюць кваліфікацыю», — дадаў ён.
Што папярэднічала
Сёлета паводле ўладаў, колькасьць кібэрзлачынстваў павялічылася на 10 адсоткаў. Апошнім часам махляры найчасьцей выманьваюць у беларусаў грошы пад выглядам «дэклараваньня», «афармленьня электроннай мэдкарткі» і «замены лічыльнікаў ці дамафонаў».
Раней паведамлялі, што з пачатку году ва ўсёй краіны зафіксавалі каля 3 тысяч падобных злачынстваў.
Тэлефонныя махлярствы адбываюцца і ў суседніх краінах. Аднак у Беларусі ёсьць свая асаблівасьць, дзе гэты від злачынства «палітызуецца». Махляры часта прадстаўляюцца сілавікамі і кіраўнікамі кантрольных ведамстваў і пагражаюць вобшукамі і арыштамі, або прадстаўнікамі іншых дзяржаўных органаў і абяцаюць дадатковыя сацыяльныя выплаты.
Летась махляры выманілі ў беларусаў 80 мільёнаў рублёў.
Форум