Як паведамляе газэта New York Times, пасьля рэзкага росту ў апошнія чатыры месяцы цэны на нафту цяпер зьнізіліся. Гэта адбылося пасьля таго, як ЗША і Іран у чэрвені дасягнулі папярэдняга пагадненьня аб аднаўленьні суднаходзтва па Армускай пратоцы, найважнейшым гандлёвым шляху для экспарту нафты і газу зь Блізкага Ўсходу.
Падзеньне цэн на нафту паскорылася, паколькі намаганьні па ліквідацыі затрымкі суднаў у Пэрсыдзкай затоцы далі плён, што зьменшыла заклапочанасьць з нагоды перабояў у пастаўках.
У чацьвер 25 чэрвеня цана нафты маркі Brent, сусьветнага эталёну нафты, упала прыкладна на 1 працэнт да ўзроўню каля 73 даляраў за барэль з пастаўкай у верасьні, што зьяўляецца самым актыўным кантрактам.
У цэлым падчас гандлёвай сэсіі цэны наблізіліся да даваеннага ўзроўню ў 72,48 даляраў за барэль. Нафта маркі West Texas Intermediate, амэрыканскага эталёна, таксама ўпала прыкладна на 1 працэнт да каля 69 долараў за барэль з пастаўкай у жніўні, што зьяўляецца самым папулярным кантрактам.
Чаму гэта важна
Беларусь закупляе расейскую нафту на льготных умовах. Цэны на расейскую марку нафты URALS на 25 чэрвеня на расейскіх біржах склалі каля 58 даляраў за барэль.
Расейская нафта знаходзіцца пад міжнароднымі санкцыямі, за мяжу яе прадаюць са значным дысконтам да рынкавай цаны.
Больш нізкія цэны на нафту лічацца добрымі для эканомікі ў цэлым, бо яны зьніжаюць выдаткі на транспарт, вытворчасьць і спажываньне.
Форум