Канфэрэнцыя праходзіць 9 сакавіка і сабрала палітыкаў, дыпляматаў і грамадзкіх лідараў. Сьвятлана Ціханоўская падзякавала віцэ-прэм’еру і міністру замежных спраў Італіі Антоніа Таяні за падтрымку Беларусі і асабістае запрашэньне на канфэрэнцыю. Яна адзначыла, што Італія стала адным з самых актыўных партнэраў беларускіх дэмакратычных сілаў.
«Нягледзячы на адлегласьць і стэрэатыпы, Італія стала адным з наймацнейшых прыхільнікаў свабоднай Беларусі», — сказала яна, згадаўшы італьянскія праграмы дапамогі беларускім дзецям пасьля Чарнобыльскай катастрофы і падтрымку беларускіх дэмакратычных ініцыятыў у парлямэнце Італіі.
У сваёй прамове Ціханоўская падкрэсьліла, што больш шырокі ўдзел жанчынаў у палітыцы робіць палітыку больш гуманнай і адказнай. У якасьці прыкладаў жаночага лідэрства яна назвала прэм’ер-міністра Італіі Джорджа Мэлёні і прэзыдэнтку Эўрапарлямэнта Робэрту Мэтсала.
Асобную ўвагу Ціханоўская надала беларускам, якія сталі сымбалямі супраціву пасьля пратэстаў 2020 года. Сярод іх — 80-гадовая актывістка Ніна Багінская, а таксама былая палітзьняволеная Марыя Калесьнікава, якая разарвала пашпарт на мяжы, каб не дапусьціць прымусовага выгнаньня з краіны.
Паводле Ціханоўскай, у беларускіх турмах застаюцца як мінімум 169 палітзьняволеных жанчынаў, якія падвяргаюцца ізаляцыі і ціску. Яна заклікала жанчын-лідэрак дэмакратычных краінаў праявіць салідарнасьць і не легітымізаваць аўтарытарныя рэжымы.
Ціханоўская таксама падкрэсьліла сувязь паміж барацьбой Беларусі і вайной ва Ўкраіне, адзначыўшы, што падтрымка Ўкраіны і дэмакратычнай Беларусі — гэта інвэстыцыя ў бясьпеку ўсёй Эўропы.
«Я веру, што менавіта жанчыны ўрэшце дапамогуць разбурыць дыктатуру і павярнуць Беларусь да дэмакратычнай і эўрапейскай будучыні», — заявіла яна.
На заканчэньне выступу Ціханоўская выказала ўпэўненасьць, што Беларусь стане свабоднай і што беларусы не забудуць падтрымку італьянскіх сяброў.
Форум