«Я прыходжу з болем у сэрцы з нагоды выкраданьня двух герояў, якія знаходзяцца ў закладніках: прэзыдэнта Нікаляса Мадура і першай лэдзі Сіліі Флёрэс», — цытуе агенцтва Reuters словы Радрыгес падчас цырымоніі прысягі.
Прысягу прыняў старшыня парлямэнту Хорхе Радрыгес, брат Дэльсі Радрыгес і сын колішняга лідэра Сацыялістычнай лігі Вэнэсуэлы Хорхэ Антоніё Радрыгеса.
У ноч на 3 студзеня амэрыканскія войскі нанесьлі ўдары па ваенных аб’ектах у сталіцы Вэнэсуэлы Каракасе і захапілі кіраўніка краіны Нікаляса Мадура і ягоную жонку Сілію Флёрэс. Улады ЗША ня лічаць Мадура легітымным прэзыдэнтам і абвінавачваюць яго і Флёрэс у «наркатэрарызме», захоўваньні зброі і кантрабандзе наркотыкаў.
5 студзеня Мадура і Флёрэс на судовым паседжаньні ў Нью-Ёрку не прызналі сябе вінаватымі ў незаконным абароце наркотыкаў і іншых злачынствах, якія інкрымінуюць ім у фэдэральных абвінавачваньнях ЗША.
Вайсковая апэрацыя ЗША адбылася пасьля некалькіх месяцаў нарастаньня эканамічнага і вайсковага ціску з боку Вашынгтона на Вэнэсуэлу, у прыватнасьці перахопу вэнэсуэльскіх нафтавых танкераў і забойства дзясяткаў людзей падчас удараў па караблях паблізу ейных водаў, якія нібыта перавозілі наркотыкі.
Нікаляс Мадура кіраваў Вэнэсуэлай з 2013 году, зьмяніўшы Уга Чавэса. Апазыцыя і праваабарончыя арганізацыі абвінавачвалі рэжым Мадуры ў фальшаваньні выбараў і парушэньнях правоў чалавека.
