Лінкі ўнівэрсальнага доступу

Украінскі таран для Беларусі. Чаму мы павінны дапамагаць украінцам


Сымболіка на ўніформе байцоў Беларускага палка імя Кастуся Каліноўскага, які ваюе за Ўкраіну. Ілютрацыйнае фота
Сымболіка на ўніформе байцоў Беларускага палка імя Кастуся Каліноўскага, які ваюе за Ўкраіну. Ілютрацыйнае фота

​​​​​​​Украіна для Беларусі служыць своеасаблівым таранам у сьвеце. Перамога Ўкраіны — непазьбежная перамога — будзе перамогай і Беларусі. Хоць і не канчатковай.

Тое, што Ўкраіна ваюе і за нас, за Беларусь — гэта не зусім лёзунг і не зусім мэтафара. Асабліва калі паглядзець на тое, як сьвет падчас вайны пачаў знаёміцца з Украінай, яе гісторыяй і трагічным шляхам, які прывёў да цяперашняга стану.

Чытаю, як у вядомым часопісе New Yorker апавядаецца пра досьвед русыфікацыі, такі знаёмы для кожнага беларуса:

«Украінскую мову я вучу гэтак жа сама, як мае дзяды і і бабулі вучылі расейскую».

На першых паліцах кнігарняў у многіх эўрапейскіх гарадах — кнігі аб гісторыі Ўкраіны. Эўрапейскія тэлеканалы здымаюць дакумэнтальныя фільмы пра Ўкраіну. Паўсюль чытаюцца лекцыі пра Ўкраіну і яе гісторыю — такую лекцыю можна было наведаць нават у зусім маленькім нямецкім мястэчку, дзе я цяпер жыву.

Беларусы біліся за тое, каб зь імі лічыліся ў сьвеце, на працягу апошніх трыццаці гадоў (а можа, і ста — гледзячы як лічыць) — і ўсё марна. Ніхто не хацеў нас заўважаць і паглыбляцца ў нашы праблемы.

Цяпер мы прынамсі атрымалі пункт, ад якога можна адштурхнуцца, калі расказваеш пра Беларусь іншаземцам. Чым больш зразумелай сьвету робіцца Ўкраіна, тым больш зразумелай яму робіцца і Беларусь.

Бо Беларусь — гэта як Украіна, толькі нашмат трагічней.

Беларусь стала першай з краінаў — суседак Расеі ахвярай бальшавікоў у 1918 годзе: раней за Ўкраіну, Польшчу і краіны Балтыі.

Беларусь раней за Ўкраіну стала ахвярай і расейскага імпэрыялізму ў 90-я, калі ельцынскі ўрад паспрыяў дзяржаўнаму перавароту, які Лукашэнка ажыцьцявіў у 1995–1996 гг. у выніку якога Беларусь ужо тады ператварылася ў адну вялікую «ДНР». Беларусь з 90-х гадоў знаходзіцца пад уладай прарасейскага аўтарытарнага рэжыму, які абслугоўвае расейскія інтарэсы і ў якасьці сваёй ідэалёгіі кіруецца чымсьці блізкім да расейскага імпэрскага нацыяналізму.

Беларусь, як і Ўкраіна, зьяўляецца аб’ектам расейскай калянізацыі і агрэсіі на працягу стагодзьдзяў. Але, у адрозьненьне ад Украіны, у выпадку зь Беларусьсю расейскі імпэрыялізм праз больш жорсткія рэпрэсіі і празь меншы памер краіны амаль што дасягнуў сваёй канчатковай мэты.

Беларуская мова знаходзіцца пад пагрозай зьнікненьня, воля да супраціву ў беларускага грамадзтва задушаная. Ёсьць дастатковая колькасьць ляяльных Расеі русыфікаваных манкуртаў зь ліку беларусаў, якія робяць непатрэбнай акупацыю Беларусі расейскімі войскамі і здольныя самі забясьпечваць фактычны расейскі кантроль над усёй Беларусьсю, а ня толькі над асобнымі рэгіёнамі, як ва Ўкраіне.

Беларусь — гэта вельмі мяккая форма таго, што было б ва Ўкраіне ў выпадку, калі б Пуцін раптам перамог.

Лепшая зразумеласьць Беларусі сьвету па аналёгіі з Украінай — гэта, здавалася б, дробязь, але з такіх дробязяў цягам апошняга стагодзьдзя крок за крокам і выпакутоўвалася беларуская незалежнасьць. І гэта хіба яшчэ адна важная прычына, чаму мы павінны дапамагаць Украіне бараніць яе незалежнасьць.

Думкі, выказаныя ў блогах, перадаюць погляды саміх аўтараў і не абавязкова адлюстроўваюць пазыцыю рэдакцыі.

  • 16x9 Image

    Алесь Чайчыц

    Нарадзіўся ў 1984 годзе ў Маскве. З пачатку 2000-х — актывіст беларускай дыяспары ў Расеі, пазьней — у Вялікай Брытаніі. З 2013 году сябра Рады Беларускай Народнай Рэспублікі. У 2017–2021 гг. сябра Вялікай Рады Згуртаваньня беларусаў сьвету «Бацькаўшчына». Друкаваўся ў «Нашай Ніве», «Беларускім партызане» і інш. Пражывае ў Нямеччыне. Узнагароджаны мэдалём да стагодзьдзя БНР.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG