Лінкі ўнівэрсальнага доступу

Застрэліў, расьсек цела, падпаліў. Ва Ўкраіне раскрылі яшчэ адно забойства, учыненае расейскім салдатам


Вёска Шаўчэнкава побач зь вёскай Безьмяцежнае. Харкаўская вобласьць. Ілюстратыўнае фота
Вёска Шаўчэнкава побач зь вёскай Безьмяцежнае. Харкаўская вобласьць. Ілюстратыўнае фота

У тэксьце апісваюцца жорсткія падрабязнасьці забойства ўкраінца расейскім вайскоўцам. Яны ўтрымліваюцца ў афіцыйным дакумэнце з матэрыялаў справы.

Сьледчыя Службы бясьпекі Ўкраіны ідэнтыфікавалі расейскага вайскоўца, які расстраляў Уладзіміра Шкіру — фэрмэра, які жыў і працаваў у Куп’янскім раёне Харкаўскай вобласьці.

У забойстве ўкраінца падазраюць вайскоўца 7-га асобнага мотастралковага палку Віталя П. з Курскай вобласьці. Яму завочна выставілі абвінавачаньне ў парушэньні правілаў і звычаяў вайны. Ягонае месцазнаходжаньне невядомае. Сьледчыя выклікалі яго на допыт 31 студзеня.

Як адзначаецца ў тэксьце падазрэньня, 31 ліпеня 2022 году Віталь П. разам з групай іншых вайскоўцаў прыехалі на аўтамабілі ў вёску Безьмяцежнае, на тэрыторыю фэрмэрскай гаспадаркі, на якой знаходзіўся 56-гадовы гаспадар Уладзімір Шкіра. Ён паходзіў з Закарпацкай вобласьці, і таму мясцовыя называлі яго «вуйкам».

Віталь П. выйшаў з машыны, паклаў зброю на капот і запатрабаваў ад фэрмэра тэрмінова падысьці да іхнай машыны, каб дапамагчы ў яе рамонце. Калі Ўладзімір Шкіра падышоў, расейскі вайсковец схапіў аўтамат і стрэліў фэрмэру ў галаву. Украінец загінуў на месцы.

Пасьля гэтага расеец узяў сякеру і адсек застрэленаму фэрмэру спачатку ногі, потым левую руку і галаву, склаў іх у мех. Зьнявечанае цела вайсковец пагрузіў у машыну і падпаліў яе, а мех з канечнасьцямі выкінуў па дарозе ў кірунку суседняй вёскі. Рэшткі цела загінулага ўкраінскага фэрмэра дагэтуль не знайшлі.

Мясцовыя жыхары расказвалі, што Ўладзімір Шкіра быў адданым украінскім патрыётам, і, імаверна, менавіта таму яго так жахліва забілі.

Ва Ўкраіне на 31 студзеня задакумэнтавалі 67 145 злачынстваў, учыненых расейскімі войскамі ад пачатку поўнамаштабнай вайны.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG