«Мы разумеем, што падняцьце стратэгічнай авіяцыі і зьнішчальнікаў на тым баку будзе, на жаль, суправаджацца трывогамі. Чакаем, што іх колькасьць найбліжэйшым часам павялічыцца, таму мусім ставіцца да гэтага адказна і не забывацца, што кожная трывога можа быць не навучальнай. Таму захоўваем спакой, але ўважліва ставімся. Такія трагедыі, якія адбыліся апошнім часам у краіне, нас абавязваюць у некалькі разоў быць больш пільнымі і рэагаваць на трывогі», — заявіў Віталь Коваль.
Кіраўнік Ровенскай вобласьці падкрэсьліў, што ўсе 229 кілямэтраў украінскай мяжы зь Беларусьсю кантралююцца. «Насычаньне вайсковымі арганізмамі і сіламі абароны і бясьпекі там дастатковае на сёньня. Але мы не спыняемся і працягваем нарошчваць абаронныя фартыфікацыйныя і інжынэрныя збудаваньні», — падкрэсьліў ён.
Кіраўнік Жытомірскай вобласьці Віталь Бунечка паведаміў, што мяжу зь Беларусьсю на Жытоміршчыне «зашываюць акопамі і заліваюць бэтонам», рыхтуючы пякельную пастку на ўкраінскім Палесьсі ў выпадку новага наступу зь беларускай тэрыторыі.
«Зараз тут працягваюць будаўніцтва дадатковых ліній абароны і мантаж фартыфікацыйных збудаваньняў. Разам зь міннымі палямі, супрацьтанкавымі равамі, іншай фізычнай загародай на кірунках патэнцыйнага прасоўваньня ворага, яны мусяць стварыць для сіл акупантаў пякельную пастку на ўкраінскім Палесьсі», — адзначаецца ў паведамленьні.
У Беларусі з 16 студзеня праходзяць беларуска-расейскія лётныя вучэньні.
Паводле Мінабароны Беларусі, 19 студзеня беларускія і расейскія войскі прыступілі да заданьняў 2-га этапу лётна-тактычных вучэньняў. У прыватнасьці, вучэньні праходзяць на аэрадромах у Мачулішчах, Лідзе і Баранавічах.
Ва Ўкраіне ў гэты час па ўсёй тэрыторыі абвясьцілі паветраную трывогу. Яна працягвалася 1 гадзіну 31 хвіліну.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
