Апошні месяц вайсковы аэрадром у Зябраўцы пад Гомлем, куды прыбываюць расейскія войскі да мяжы з Украінай, вельмі актыўна зьмяняецца. Літаральна за месяц там зьявілася некалькі пяшчаных насыпаў, будаўнічыя работы працягваюцца. Свабода прасачыла за зьменамі на лётнішчы з дапамогай спадарожнікавых здымкаў.
Чытачы Свабоды паведамляюць, што апошнім часам туды прыбыло больш расейскай тэхнікі і вайскоўцаў.
«Насамрэч у Зябраўку (Гомельскі раён) расейская вайсковая тэхніка і жывая сіла прыбылі яшчэ тыдня паўтара таму. Расейцы там заставаліся яшчэ зь вясны, але абмежаванай колькасьцю. На Зябраўку доступ, як і раней, закрыты. Як стаялі, так і стаяць войскі РФ, але цяпер там больш тэхнікі і людзей», — расказала крыніца з Гомельскага раёну.
Вось так выглядаў вайсковы аэрадром у Зябраўцы 24 жніўня 2022 году.
А вось так стаў выглядаць празь месяц, 16 кастрычніка 2022 году.
Бачым, што ў паўночнай частцы аэрадрому будуюцца насыпы зь пяску. Прычым пясок не прывозіцца звонку, а бярэцца проста ў кар'ерах на аэрадроме.
Падобныя збудаваньні ў выглядзе насыпаў можна пабачыць, напрыклад, у вайсковай частцы 1146 зэнітна-ракетнага палка, які выконвае задачы па абароне Астравецкай АЭС. Там на насыпах усталяваныя радыёлякацыйныя станцыі (глядзіце на фота ніжэй), якія служаць для вызначэньня цэляў і навядзеньня ракет.
Па спадарожнікаваму здымку відаць, што на тэрыторыі аэрадрома ў Зябраўцы павялічылася колькасьць вайсковых грузавікоў, пашырылася тэрыторыя вайсковага лягеру, відаць знаходжаньне зэнітна-ракетных комплексаў С-300 і С-400. На здымку за 16 кастрычніка бачым таксама чыгуначны састаў, які прыбыў з гаручым.
Радыё Свабода сочыць далей за разьвіцьцём сытуацыі на беларускіх вайсковых аб’ектах. Калі ў вас ёсьць інфармацыя, якой вы можаце з намі падзяліцца, дасылайце, калі ласка, у рэдакцыю.
- Наш тэлеграм-бот @SvabodaBelarus_bot
- Наш нумар у Signal +380502605369
Што вядома пра аэрадром «Зябраўка»?
Пра выкарыстаньне расейскімі войскамі вайсковага аэрадрому «Зябраўка» пад Гомлем стала вядома ў першыя дні вайны. Адтуль рэгулярна выляталі самалёты і гелікоптэры, запускалі ракеты па Ўкраіне.
Расейскія вайскоўцы засталіся на тэрыторыі «Зябраўкі» і пасьля адыходу расейцаў з поўначы Ўкраіны і часткова з тэрыторыі Беларусі на пачатку красавіка.
Ад «Зябраўкі» да тэрыторыі Ўкраіны, якую кантралюе ўрад у Кіеве, каля 50 кілямэтраў.
Гэтага больш чым дастаткова для ракетных удараў як старой савецкай зброяй кшталту комплексаў «Точка-У», так і новымі заходнімі сыстэмамі залпавага агню накшталт амэрыканскай HIMARS.
«Зябраўка» даволі блізка ад Гомля, густанаселены Навабеліцкі раён абласнога цэнтру ўсяго за дзесяць кілямэтраў ад вайсковага аэрадрому.
У ноч з 10 на 11 жніўня жыхары паўднёвых раёнаў Гомля і навакольных вёсак чулі гукі, падобныя да выбухаў, і бачылі сполахі на небе. Міністэрства абароны Беларусі паспрабавала супакоіць беларусаў: «10 жніўня каля 23 гадзіны ў часе кантрольнага прабегу адной з адзінак тэхнікі пасьля праведзенай замены рухавіка адбылося загараньне». Аднак у вэрсію міністэрства мала хто паверыў.
Украінскае кіраўніцтва неўзабаве абвергла інфармацыю аб тым, што ўдар нанесьлі Ўзброеныя сілы Ўкраіны.
У сярэдзіне жніўня праект «Беларускі Гаюн» прааналізаваў узбраеньне, якое знаходзіцца на аэрадроме Зябраўка ў Гомельскай вобласьці, і прыйшоў да высновы, што расейскія войскі рыхтуюцца нанесьці масіраваны ракетны ўдар па Ўкраіне.
Ракеты і дроны зь беларускай тэрыторыі працягвалі ляцець на Ўкраіну ў верасьні і кастрычніку 2022 году.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
