«Пайшлі масавыя звароты ў „Русь сидящая“ з краін СНД. Грамадзян Беларусі, Узбэкістану, Кіргізістану, Азербайджану, якія адбываюць пакараньне ў месцах пазбаўленьня волі ў РФ, вязуць на вайну.
Сястра загінулага зьняволенага, грамадзяніна Беларусі, ня можа дамагчыся ад ПВК «Вагнэр» цела брата, каб пахаваць на радзіме. Ні пра якія грошы, ні пра якую кампэнсацыю гаворкі не ідзе», — расказала ў сваім тэлеграм-канале кіраўніца руху «Русь сидящая» Вольга Раманава.
Вольга Раманава адзначыла, што на мінулым тыдні атрымалася абараніць чатырох грамадзян Узбэкістану, якія адбывалі тэрмін у яраслаўскіх зонах.
«А сёньня ўвечары зьвярнуліся сваякі ўзбэкаў, якія сядзелі ў Башкірыі. Забралі іх. Нам у „Русь сидящую“ напісала пасольства Ўзбэкістану, будзем трымаць сувязь. Агу, пасольствы Азербайджана, Кіргізістану, Таджыкістану! Ня хочаце пацікавіцца, чаму вашых грамадзян адпраўляюць забіваць украінцаў?», — напісала Раманава.
ПВК «Вагнэр» — расейскае неафіцыйнае вайсковае падразьдзяленьне, якое ня значыцца на балянсе вайсковых ведамстваў і ў рэестры юрыдычных асобаў, аднак яго байцы, па зьвестках шматлікіх журналісцкіх расьсьледаваньняў, бяруць удзел у наземных апэрацыях РФ у Сырыі, Афрыцы і ў вайне ва Ўкраіне.
ПВК «Вагнэр» лічыцца адным з найбольш баяздольных падразьдзяленьняў, якія ўдзельнічаюць у баях на ўкраінскіх тэрыторыях. Паводле зьвестак расьсьледніцкай групы Bellingcat, байцы «Вагнэра» маюць дачыненьне да шматлікіх ваенных злачынстваў.
Паводле шматлікіх зьвестак, якія зьяўляліся ў расейскіх СМІ ў апошнія месяцы вэрбавалі на вайну ва Ўкраіну і зьняволеных у расейскіх калёніях. Паведамлялася, што прыяжджаў туды асабіста расейскі бізнэсмэн, уладальнік ПВК Яўген Прыгожын, якога лічаць цесна зьвязаным з прэзыдэнтам Расеі Ўладзімірам Пуціным. Загінулым на вайне ён абяцаў дастойнае пахаваньне. Тым, хто адваяваў паўгода, абяцае памілаваньне, ахвотным — далейшую працу ў ПВК.
Пры гэтым Яўген Прыгожын доўгі час адмаўляў як сваю сувязь з ПВК, так і вэрбаваньне зьняволеных.
Аднак напрыканцы верасьня 2022 году ён пацьвердзіў, што зьяўляецца заснавальнікам прыватнай ваеннай кампаніі «Вагнэр». Адпаведнае прызнаньне зьмяшчалася ў адказе прэс-службы зьвязанай з Прыгожыным кампаніі «Канкорд на запыт выданьня «Блокнот», апублікаваным у панядзелак, 26 верасьня, у расейскіх інтэрнэт-СМІ.
У сваім адказе Прыгожын паведамляе, што стварыў ваенізаванае фармаваньне ў траўні 2014 года для падтрымкі сэпаратыстаў Данбаса. Тады, зазначыў ён, «нарадзілася група патрыётаў, якая пасьля набыла назву БТГ «Вагнэр».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.