«Паводле зьвестак галоўнага ўпраўленьня выведкі, перш за ўсё актыўна працуе цяпер „Вагнэр“, — сказаў ён. — Разгарнулі ў Менску і некаторых гарадах свае вэрбавальныя пункты і вядуць набор ахвочых „працаваць“ у „Вагнэры“, удзельнічаць у вайне супраць Украіны. Колькі ім удасца завэрбаваць людзей, будзем высьвятляць. Але такія захады менавіта на тэрыторыі Беларусі праводзяцца».
Скібіцкі заявіў, што цяпер каля мяжы з Украінай сканцэнтравана шэсьць батальёнаў Узброеных сіл Беларусі. «Гэта мэханізаваныя батальёны, батальёны паветрана-дэсантных войскаў — так званага камандаваньня сілаў спэцыяльных апэрацый», — канкрэтызаваў прадстаўнік украінскай вайсковай выведкі.
Паводле яго, Аляксандр Лукашэнка «гатовы аддаць» Уладзіміру Пуціну «тое, што ён мае, няхай гэта выкарыстоўвае Расейская Фэдэрацыя», але не пасылае свае войскі на вайну супраць Украіны. «Як доўга будзе працягвацца такая сытуацыя, залежыць ад таго, як будуць разьвівацца падзеі на нашай тэрыторыі, на фронце. І ў цэлым ад далейшага разьвіцьця падзеяў у вайне Расеі супраць нашай дзяржавы», — адзначыў Скібіцкі.
Разам з тым прадстаўнік украінскай вайсковай выведкі перакананы, што Расея не пакідае спробаў прымусіць улады Беларусі адкрыта ўступіць у вайну.
«Пастаянна праводзяцца сустрэчы Пуціна і Лукашэнкі, дзе абмяркоўваюцца гэтыя пытаньні, Пуцін спрабуе схіліць Лукашэнку да гэтага рашэньня, — заявіў ён. — Апошняя сустрэча адбылася зусім нядаўна... Зноў жа, хутчэй за ўсё, абмяркоўвалася пытаньне і падтрымкі, і ўступленьня Беларусі ў вайну. Акрамя таго, мы не выключаем (вайсковая выведка прааналізавала ўсе даныя, якія ёсьць), што Пуцін размаўляў з Лукашэнкам аб прызнаньні анэксіі нашых тэрыторыяў і вынікаў так званых «рэфэрэндумаў».
Аляксандр Лукашэнка на нарадзе аб вайсковай бясьпецы 4 кастрычніка заявіў, што Беларусь удзельнічае ў «спэцыяльнай ваеннай апэрацыі» ва Ўкраіне. «Мы гэтага не хаваем. Але мы нікога не забіваем. Мы нікуды не пасылаем сваіх вайскоўцаў. Мы не парушаем свае абавязаньні», — сказаў ён.
Тэрмінам «спэцыяльная ваенная апэрацыя» расейскае, а ўсьлед за ім і беларускае кіраўніцтва называюць поўнамаштабную вайну супраць украінскага народу, якую РФ пачала 24 лютага. Улады ў Менску адмаўляюць удзел беларускай арміі ў баявых дзеяньнях на баку РФ, у той жа час тэрыторыя Беларусі з пачатку ўварваньня, а таксама ў асобныя пэрыяды пазьней актыўна выкарыстоўвалася расейскай арміяй для нанясеньня ўдараў па Ўкраіне.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
- Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
- У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў