Лінкі ўнівэрсальнага доступу

У Расеі вынесьлі першы вырак за эмоджы пад пастамі пра вайну


Аляксей Аргуноў
Аляксей Аргуноў

Выкладчыка філязофіі і гісторыі з расейскага Барнаулу аштрафавалі за рэакцыю пад антываеннымі пастамі і відэа. Гэта першы выпадак, калі артыкул аб дыскрэдытацыі войска РФ (арт 20.3.3 КаАП) інкрымінавалі не за публікацыю або рэпост, а за «сумны» эмоджы пад чужым пастом супраць вайны.

Праект Радыё Свабода «Сибирь.Реалии» паведамляе, што Аляксей Аргуноў спачатку не паверыў, калі яго запрасілі ў паліцыю і зачыталі пратакол, створаны паводле матэрыялаў ФСБ, быў упэўнены, што пасьля праверкі справу закрыюць, бо несур’ёзнасьць абвінавачаньня разумелі і самі паліцыянты. Пазьней тыя ж паліцыянты абвясьцілі Аргунову: «Вам не пашанцавала», а праз два дні суд прызнаў яго вінаватым.

Пасты, за «клясы» і падабайкі Аргунова аштрафавалі на 30 тысяч рублёў (каля 520 даляраў), эмоджы датаваныя 12 красавіка, 17 сакавіка і 4 сакавіка.

«Аказваецца, пад дзеяньні, якія дыскрэдытуюць войска, трапляе сумны смайлік пад чужым пастом аб тым, што лідэра алтайскага «Яблока» Ганчарэнку асудзілі паводле гэтага ж артыкулу аб дыскрэдытацыі. Або эмоджы «кляс» пад відэа «амэрыканскага актора Шварцэнэгера, разьмешчанага ў групе «Грамадзянская абарона» з наступным тэкстам: «Некаторым сказалі, што яны там, каб абараніць рускіх ва Ўкраіне», — пералічыў інкрымінаваныя «эпізоды» Аргуноў.

Штрафы за «дыскрэдытацыю ўзброеных сіл РФ» зьявіліся ў адміністрацыйным кодэксе Расеі ў сакавіку, з пачаткам расейскай ваеннай агрэсіі ва Ўкраіне, якую ўлады называюць «спэцапэрацыяй». Акрамя таго, у Крымінальным кодэксе Расеі зьявіўся артыкул аб распаўсюдзе недакладных зьвестак аб расейскім войску падчас «спэцапэрацыі». З таго часу жыхароў Расеі рэгулярна штрафуюць за антываенныя пасты ці нават выказваньні ў прыватных гутарках. Часьцей за ўсё падставай для перасьледу становіцца данос знаёмых чалавека, які пратэстуе супраць вайны, у паліцыю.

8 ліпеня паводле артыкулу за ваенныя «фэйкі» да 7 гадоў калёніі прыгаварылі дэпутата Масквы Аляксея Горынава. Гэта першы такі суровы прысуд па гэтым артыкуле.

Расейскія суды спагналі ўжо больш за 50 мільёнаў рублёў (каля 870 тысяч даляраў) паводле артыкулу аб «дыскрэдытацыі» войска РФ. За няпоўныя пяць месяцаў па гэтым артыкуле было складзена 3033 пратаколы, кожная дваццатая справа была закрытая, паведамляе праект «Сетевые свободы» са спасылкай на дадзеныя МУС.

У сярэднім паліцыя складае 35 пратаколаў аб «дыскрэдытацыі» ўзброеных сіл кожны працоўны дзень, гаворыцца ў паведамленьні праекту. У 92% адміністрацыйных спраў, рашэньні ў якіх набылі моц (усяго 1547 спраў), суды прызначылі штраф, 90 спраў было спынена, яшчэ 38 — вернута ў паліцыю.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG