Галоўнае на гэты момант
- Расейскія вайскоўцы ўначы і раніцай 27 траўня абстралялі Днепрапятроўскую вобласьць, ёсьць «сур'ёзныя разбурэньні», паведаміў кіраўнік абласной вайсковай адміністрацыі Валянцін Разьнічэнка. Інфармацыя пра ахвяры ўдакладняецца.
- На Славянскім кірунку расейцы працягваюць абстрэл пазыцый Узброеных сіл Украіны, аднавілі наступ.
- Пры абстрэле расейцамі Харкава загінулі 9 чалавек, 19 параненыя.
- Украінцы атрымалі францускія гаўбіцы Caesar і ўпершыню выкарысталі іх на фронце.
- Канцлер Нямеччыны заявіў, што Пуціну не ўдалося дасягнуць усіх яго стратэгічных мэтаў, і выказаў упэўненасьць, што прэзыдэнт Расеі не пераможа ў вайне ва Ўкраіне.
- Расейцы крылатымі ракетамі абстралялі Запарожжа, пацэлілі ў цэхі заводу «Мотор-Січ». Абстрэлы працягнуліся і ўвечары таго дня.
- Працягваюцца баі ў Луганскай і Данецкай абласьцях, расейцы атакуюць Севераданецк.
- МАГАТЭ заявіла, што ня мае доступу на Запароскую АЭС, якую захапілі расейскія войскі.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.
Што адбываецца 26 і 27 траўня
Апублікавалі першую незалежную справаздачу аб меркаваным генацыдзе ўкраінцаў
У справаздачы аналітычнага цэнтру New Lines Institute for Strategy and Policy і Цэнтру правоў чалавека імя Валенбэрга адзначаецца, што «дзеяньні РФ ва Ўкраіне даюць падставы зрабіць выснову, што Масква падбухторвае да генацыду і чыніць зьверствы, накіраваныя на зьнішчэньне ўкраінскага народу».
Незалежную справаздачу аб меркаваным генацыдзе ўкраінцаў падпісалі больш за 30 вядучых вучоных, юрыстаў і экспэртаў у генацыдзе. Яе копіі разашлюць урадам і міжнародным арганізацыям па ўсім сьвеце.
Херсонскія ўлады заявілі аб крытычнай гуманітарнай сытуацыі ў рэгіёне
Кіраўнік Херсонскай абласной вайсковай адміністрацыі Генадзь Лагута заявіў, што расейскія войскі цягам трох месяцаў акупацыі рэгіёну блякуюць арганізацыю «зялёных калідораў» для гуманітарнай дапамогі і эвакуацыі грамадзян на падкантрольную Ўкраіне тэрыторыю.
«Гуманітарная сытуацыя ў некаторых вёсках проста крытычная: няма сувязі, няма прадуктаў, няма мэдыкамэнтаў», — сказаў Генадзь Лагута на брыфінгу 27 траўня празь відэасувязь з Кіевам.
Кіраўнік Херсонскай абласной вайсковай адміністрацыі дадаў, што пачынаючы з 11 траўня мясцовыя жыхары практычна ня могуць выехаць на падкантрольную Ўкраіне тэрыторыю — у Мікалаеў і Крывы Рог.
Расейцы абстралялі Харкаў: ёсьць загінулыя і параненыя
Расейскія вайскоўцы 26 траўня зноў абстралялі Харкаў, паведаміў кіраўнік Харкаўскай абласной вайсковай адміністрацыі Алег Сінягубаў і заклікаў харкаўчан не пакідаць месцы бясьпекі.
Алег Сінягубаў паведаміў пра 9 загінулых і 19 параненых у выніку абстрэлу. Пазьней стала вядома, што ў выніку абстрэлаў Харкава таксама загінула пяцімесячнае дзіця, паведаміў кіраўнік Нацыянальнай паліцыі Ўкраіны Ігар Кліменка.
Пад Запарожжам зьбілі крылатую ракету
Увечары 25 траўня ў час паветранай трывогі ўкраінская супрацьпаветраная абарона зьнішчыла варожую ракету. Пра гэта паведаміў кіраўнік Хмяльніцкай абласной вайсковай адміністрацыі Сяргей Гамалій.
Паводле яго, абломкі расейскай ракеты ўпалі ў поле, не прычыніўшы пашкоджаньняў. Стратаў у выніку варожых абстрэлаў няма. Нягледзячы на пасьпяховыя дзеяньні ўкраінскіх зэнітчыкаў, якія гэтым разам перашкодзілі праціўніку нанесьці прыцэльны ракетны ўдар, кіраўнік адміністрацыі заклікаў жыхароў рэгіёну быць асьцярожнымі падчас авіяналётаў і хавацца ў сховішчы.
Раніцай 25 траўня расейскія акупанты абстралялі Запарожжа з ракет. Адна ракета была зьбіта супрацьпаветранай абаронай. Астатнія тры пашкодзілі інфраструктуру, у тым ліку мясцовы гандлёва-забаўляльны цэнтар і жылыя дамы.
У навакольлі Севераданецку працягваюцца цяжкія баі
«У навакольлі Севераданецку працягваюцца цяжкія баі, вораг спрабуе прарвацца ў горад. Абласны цэнтар зьнішчаюць артылерыяй і авіяцыяй», — заявіў кіраўнік Луганскай абласной дзяржаўнай адміністрацыі Сяргей Гайдай.
Раней 26 траўня дарадца кіраўніка Офісу прэзыдэнта Ўкраіны Аляксей Арастовіч расказаў, што расейскае войска, паводле папярэдніх непацьверджаных дадзеных, захапіла горад Ліман за 50 км ад Севераданецку.
Генштаб Украіны: Беларусь «зачышчае» наступствы знаходжаньня расейскіх войскаў
На тэрыторыі Рэспублікі Беларусь вядзецца пошук і ўтылізацыя боепрыпасаў і зброі, згубленых расейцамі. Пра гэта паведамляецца ў ранішняй зводцы Генштабу Ўзброеных Сіл Украіны.
«Наступствы разьмяшчэньня на тэрыторыі Ўкраіны падразьдзяленьняў Узброеных сіл РФ, якія ўдзельнічаюць у баявых дзеяньнях, ліквідуюцца. Прымаюцца меры для прадухіленьня незаконнага абарачэньня зброі і боепрыпасаў, якія могуць быць страчаны расейскімі падразьдзяленьнямі».
У Генштабе таксама адзначылі, што з асабовым складам вайсковых частак Узброеных сіл Рэспублікі Беларусь праводзяцца камандна-штабныя і мабілізацыйныя вучэньні. Захоўваецца верагоднасьць нанясеньня ракетных і авіяцыйных удараў з тэрыторыі Беларусі па тэрыторыі Ўкраіны.
У Данецкай вобласьці за дзень загінулі 5 мірных жыхароў
26 траўня ў Данецкай вобласьці пад абстрэламі загінулі пяцёра мірных жыхароў, паведаміў кіраўнік аблдзяржадміністрацыі Паўло Кірыленка. Двое загінулі ў Мар’інцы, двое — у Лімане і адзін — у сяле Зара.
Украіну наведала прэм'ер-міністарка Фінляндыі Санна Марын
Яна працягнула пагадненьне аб дапамозе ў рэформе ўкраінскай адукацыі і паабяцала ўдзел Фінляндыі ў аднаўленьні інфраструктуры Ўкраіны, паведаміў украінскі прэм'ер-міністар Дзяніс Шмыгаль.
У Вярхоўнай Радзе разгледзяць законапраект аб канфіскацыі ўласнасьці Беларусі за дапамогу Расеі ў вайне
Вярхоўная Рада Ўкраіны разгледзіць законапраект аб адабраньні ўласнасьці Беларусі за прадастаўленьне Расеі тэрыторыі для нанясеньня авіяцыйных і ракетных удараў. У тлумачальнай запісцы Беларусь названая «суагрэсарам». Законапраект уносіць зьмены ў закон, падпісаны Ўладзімірам Зяленскім на пачатку сакавіка 2022 году: ён дазваляе канфіскоўваць уласнасьць Расеі і яе рэзыдэнтаў ва Ўкраіне.
Ва Ўкраіне арыштавалі беларускія ўгнаеньні на 20 мільёнаў даляраў
У марскім порце ў Мікалаеўскай вобласьці знайшлі 77 тысяч тон мінэральных угнаеньняў, якія належалі беларускай кампаніі. Маёмасьць арыштаваная ў рамках крымінальнай справы за «злоўжываньні службовых асоб Мікалаеўскай мытні, якія садзейнічалі незаконнаму перамяшчэньню санкцыйных тавараў праз мытны кантроль».
Пэнтагон: Расея страціла ў вайне з Украінай каля 1000 танкаў
Паводле ацэнак Міністэрства абароны ЗША, Расея з пачатку вайны супраць Украіны страціла амаль 1000 танкаў, больш за 350 адзінак артылерыі, каля 36 бамбавікоў і звыш 50 верталётаў. Амэрыканскі бок адзначае, што Расея «ўсё яшчэ захоўвае пераважную частку сваіх сіл»:
«У вайне з Украінай яны (Расея. — РС) вельмі шмат уклалі ва ўзбраеньне і асабовы склад, і страты нясуць як украінцы, так і расейцы, — лічаць у Пэнтагоне. — У вайне расейцы маюць перавагу з пункту гледжаньня колькасьці адзінак асабовага складу, узбраеньня і адзінак зброі, што прымяняюцца імі. Гэта трэба мець на ўвазе».
У Кіеве асудзілі дэзэртэра
Дняпроўскі раённы суд Кіева прызнаў вінаватым у дэзэртэрстве і дзяржаўнай здрадзе (артыкулы 408, 111 КК Украіны) былога ўкраінскага вайскоўца Міхаіла Казаранку, які пасьля далучэньня Крыму ўступіў у расейскую армію. Яго прыгаварылі да 14 гадоў пазбаўленьня волі.
Казаранка служыў у 126-й асобнай гвардзейскай брыгадзе берагавой аховы Расеі ў званьні старшага сяржанта. Раней ён служыў у 36-й брыгадзе берагавой аховы ВМС Украіны.
Што адбываецца ў Расеі
У Расеі заканадаўча скасавалі ўзроставую мяжу для кантрактнай службы
Цяпер заключыць кантракт з расейскім войскам можна будзе да заканчэньня працаздольнага ўзросту, гэта значыць да 65 гадоў.
Расея ўводзіць пэрсанальныя санкцыі ў дачыненьні да 154 чальцоў Палаты лордаў Вялікай Брытаніі
Пра гэта паведамляе МЗС РФ. У паведамленьні гаворыцца, што яны «зрабілі непасрэдны ўнёсак у выпрацоўку антырасейскіх санкцыйных захадаў Лёндана, нацэленых на стварэньне ўмоваў для палітычнай ізаляцыі Расеі і разбурэньне яе эканомікі, выкарыстоўвалі свой аўтарытэт для нагнятаньня антырасейскай гістэрыі ў Вялікай Брытаніі».
Удзел Беларусі ў вайне
Беларусь дазволіла Расеі скарыстаць сваю тэрыторыю для нападаў на Ўкраіну з поўначы; расейцы выкарыстоўваюць беларускія аэрадромы для палётаў і беларускія пляцоўкі для ракетных абстрэлаў гарадоў Украіны. Разам з тым на баку Ўкраіны ў розных злучэньнях ваююць беларусы. Створаны батальён імя Кастуся Каліноўскага, які цяпер рэарганізуецца ў полк.
Лукашэнка заснаваў новае апэрацыйнае вайсковае камандаваньне ў Беларусі — паўднёвае
Гэты крок матываваны эскаляцыяй баявых дзеяньняў ва Ўкраіне. Да гэтага часу ў Беларусі былі два апэрацыйныя камандаваньні — паўночнае і паўночна-заходняе.
Украінскі Генштаб: у Беларусі разгарнулі комплексы «Точка-У» і «Сьмерч»
У Беларусі на асобных палігонах разгарнулі два ракетныя дывізіёны тактычнага ракетнага комплексу «Точка-У» і дывізіён рэактыўнай сыстэмы залпавага агню «Сьмерч», паведаміў Генштаб Узброеных сіл Украіны ў вечаровай зводцы 20 траўня. Пагроза ракетна-бомбавых удараў і артылерыйскіх абстрэлаў з тэрыторыі Беларусі пакуль ня зьнікла.
Беларускае войска ля мяжы з Украінай
Кіраўнік Генэральнага штабу Ўзброеных сіл, першы намесьнік міністра абароны Беларусі Віктар Гулевіч заявіў аб пачатку другога этапу праверкі сіл апэратыўнага рэагаваньня.
Паводле ягоных слоў, у рамках гэтага этапу на Заходні і Паўночна-Заходні апэрацыйныя кірункі рушылі батальённа-тактычныя групы, а для іх узмацненьня — падразьдзяленьні супрацьпаветранай абароны, ракетных войскаў і артылерыі, якія будуць забясьпечваць іхнае баявое функцыянаваньне.
Паводле Гулевіча, падразьдзяленьні сіл спэцыяльных апэрацый разгарнулі на трох тактычных кірунках паўднёвага кірунку (да мяжы з Украінай. — РС).
Як рэагуе сьвет
Канцлер Нямеччыны заявіў, што Пуціну не ўдалося дасягнуць усіх яго стратэгічных мэтаў
Оляф Шольц выказаў упэўненасьць, што прэзыдэнт Расеі не пераможа ў вайне ва Ўкраіне.
Ён заявіў, што «захоп усёй Украіны Расеяй сёньня здаецца больш аддаленым, чым на пачатку вайны». «Пры гэтым, як ніколі раней, Украіна падкрэсьлівае сваю эўрапейскую будучыню», — дадаў ён.
ЗША рыхтуюцца зацьвердзіць пастаўку ўдасканаленай ракетнай сыстэмы для Ўкраіны
Удасканаленая ракетная сыстэма вялікай далёкасьці можа быць пастаўлена Ўкраіне ўжо найбліжэйшым часам. Адміністрацыя амэрыканскага прэзыдэнта Джо Байдэна рыхтуецца павялічыць віды ўзбраеньняў, якія яна прапануе Ўкраіне, адпраўляючы туды перадавыя ракетныя сыстэмы, якія цяпер зьяўляюцца галоўным запытам украінскіх чыноўнікаў, піша CNN.
Адміністрацыя схіляецца да адпраўкі сыстэм у рамках большага пакета вайсковай дапамогі і дапамогі ў бясьпецы Ўкраіны, пра што можа быць абвешчана ўжо на наступным тыдні.
Яшчэ адна сыстэма, якую запытала Ўкраіна, — ракетная сыстэма высокай мабільнасьці, вядомая як HIMARS, больш лёгкая колавая сыстэма, здольная страляць многімі з тых жа тыпаў боепрыпасаў, што і РСЗА.
Іншая сур’ёзная заклапочанасьць адміністрацыі Байдэна заключалася ў тым, ці могуць ЗША дазволіць сабе аддаць столькі зброі высокай клясы, атрыманай з вайсковых запасаў, сказалі крыніцы выданьня. Адміністрацыя таксама разважала наконт забесьпячэньня Ўкраіны дадатковымі зьнішчальнікамі МіГ-29, якія, на думку некаторых, могуць дазволіць украінцам перанесьці вайну на тэрыторыю Расеі. Урэшце ЗША вырашылі не засылаць у Польшчу новыя самалёты, што дазволіла б палякам перадаць Украіне МіГі савецкага часу.
Італія, Вугоршчына і Кіпр выступаюць за «мірныя перамовы і неадкладнае спыненьне агню»
Вугоршчына і Кіпр падтрымалі ініцыятыву Італіі ўнесьці патрабаваньне аб спыненьні агню і мірных перамовах з Расеяй у праект заявы па выніках саміту ЭЗ 30–31 траўня.
Як піша Reuters, Вугоршчына выступае супраць увядзеньня забароны на імпарт нафты, а Кіпр занепакоены прапанаванай забаронай на продаж нерухомасьці грамадзянам Расеі. Італія ж настойвае, што мірныя перамовы з Расеяй — адна зь першачарговых мэтаў ЭЗ у цяперашнім становішчы.
На мінулым тыдні Італія прапанавала плян мірнага ўрэгуляваньня канфлікту, які выклікаў крытыку як ва Ўкраіне, так і ў Расеі.
ЭЗ павялічыць фінансаваньне абароны на 3 мільярды эўра
25 траўня Эўрапейская камісія абвясьціла аб выдзяленьні аднаго мільярда эўра на фінансаваньне Эўрапейскага абароннага фонду, і яшчэ двух мільярдаў — на фінансаваньне дасьледаваньняў у галіне абаронных інавацый. Па словах эўракамісара па ўнутраным рынку Т’еры Брэтона, дадатковае фінансаваньне з Эўрапейскага абароннага фонду пойдзе на разьвіцьцё сумесных абаронных праектаў у космасе, кібэрпрасторы і высокіх тэхналёгіях.
Эстонія перадала Ўкраіне 1/3 усяго свайго вайсковага бюджэту
За 3 месяцы Эстонія пералічыла Ўкраіне 1/3 свайго вайсковага бюджэту — найбольш у сьвеце, паведаміў дарадца кіраўніка Адміністрацыі прэзыдэнта Ўкраіны Міхаіл Падаляк. «Гэта яшчэ раз сьведчыць: можна быць маленькай краінай, але мець вялікае сэрца, а можна быць другой па велічыні, але ня мець яго зусім. Перамога будзе перамогай народу», — дадаў ён.
Канада закупіла для Ўкраіны 20 тысяч снарадаў для гаўбіц M777
Пра гэта заявіла міністар абароны краіны Аніта Ананд. «Нельга дапусьціць, каб поўнамаштабнае, незаконнае ўварваньне Пуціна ва Ўкраіну было пасьпяховым, і яно такім ня будзе», — сказала Ананд.
Боепрыпасы купілі прыкладна за 98 мільёнаў канадзкіх даляраў, неўзабаве іх даставяць ва Ўкраіну. Гэтыя 155-мм снарады сумяшчальныя з гаўбіцамі М777, якія Канада і ЗША перадалі Ўкраіне раней.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
